“დღეს თქვენ დატოვებთ სკოლის კედლებს და ცხოვრების ახალ ეტაპზე შეაბიჯებთ” – “ბოლო ზარი” სკოლაში, მიხეილ ჩხენკელის მილოცვა მეთორმეტე კლასელებს

დღეს სკოლებში მეთორმეტე კლასის მოსწავლეებისათვის “ბოლო ზარი” დაირეკა. ეს მნიშვნელოვანი დღე, საქართველოს განათლებისა და მეცნიერების მინისტრმა, მიხეილ ჩხენკელმა დამამთავრებელი კლასების მოსწავლეებს მიულოცა და წარმატებები უსურვა. მიხეილ ჩხენკელის მილოცვის ტექსტს, რომელსაც განათლებისა და მეცნიერების სამინისტრო ავრცელებს, უცვლელად გთავაზობთ:

„ძვირფასო ახალგაზრდებო, თქვენს ცხოვრებაში დასრულდა ერთი უაღრესად მნიშვნელოვანი პერიოდი, ახალი ცოდნის მიღებისა და მეგობრების შეძენის 12 წელიწადი. დღეს თქვენ დატოვებთ სკოლის კედლებს და ცხოვრების ახალ ეტაპზე შეაბიჯებთ.

არ შემიძლია არ აღვნიშნო, რომ თქვენ განსაკუთრებული ახალგაზრდები ხართ. მაშინ, როცა პანდემიამ მკვეთრად შეცვალა ყველა ჩვენგანის ცხოვრება, თქვენ გაუმკლავდით მოულოდნელ სირთულეებს და წარმატებით დაასრულეთ სწავლა. ეს დიდი გამოცდილება აუცილებლად იქონიებს დადებით გავლენას თქვენს მომავალზე და, დარწმუნებული ვარ, ცხოვრების გზაზე გაჩენილ ყველა გამოწვევას შესაძლებლობად აქცევთ.

მინდა მუდამ გახსოვდეთ, რომ განათლება თქვენი მომავლის საძირკველი და საზოგადოების სწორი მიმართულებით განვითარების ერთ-ერთი უმნიშვნელოვანესი წინაპირობაა. არ დაივიწყოთ ეს, რადგან ხვალიდან თქვენ წინაშე უამრავი საინტერესო პერსპექტივა იხსნება, ცხოვრება ახალ შესაძლებლობებს შემოგთავაზებთ, წინ გელით ახალი ურთიერთობები, მეგობრები და პასუხისმგებლობები. მთელი გულით გისურვებთ წარმატებებს ცხოვრების ამ ახალ ეტაპზე. დარწმუნებული ვარ, ცოდნის შეძენისა და მისი გაღრმავების სურვილი არასოდეს გაგინელდებათ.

კიდევ ერთხელ მინდა გისურვოთ ბედნიერი და საინტერესო ცხოვრება. გახსოვდეთ, რომ ჩვენი ქვეყნის მომავლის შემქმნელები სწორედ თქვენ ხართ. ჩვენ თქვენი იმედი გვაქვს“, – აცხადებს მიხეილ ჩხენკელი.

საინფორმაციო სააგენტო “პარალელი” ყველა დამამთავრებელი კლასის მოსწავლეს ულოცავს სკოლის დასრულებას, უსურვებს წარმატებებსა და დასახული მიზნების ასრულებას!