საბანკო რეგულაციებთან დაკავშირებით კონკრეტულ პოზიციას აფიქსირებს საქართველოს ეკონომიკისა და მდგრადი განვითარების მინისტრი, გიორგი ქობულია.
“დაკვირვების შედეგებზე დამყარებით, ჩვენ შევიტანთ კორექტირებას, თუ ეს იქნება საჭირო რეგულაციებში. რაც მთავარია, თვითონ რეგულაციების ვექტორი არ შეიცვლება, ანუ, ძირითადად, გენერალური მიმართულება იქნება ისეთი, როგორიც არის დღეს. რა გადაწყვეტილებაც მივიღეთ, ჩვენ ამას არ გადავუხვევთ. ჩვენ არ გვჭირდება ხალხი, რომელიც კრედიტს მიიღებს იმისთვის, რომ მაცივარი იყიდოს ან ტელევიზორი იყიდოს და ამის მერე “შავ სიაში” ხვდება და შეიძლება ბინაც ჰქონდეს გასაყიდი” – განაცხადა გიორგი ქობულიამ ტელეკომპანია “იმედთან” ინტერვიუში.
ეკონომიკისა და მდგრადი განვითარების მინისტრი, იპოტეკურ რეგულაციებში ჩადებული პირობების გადახედვასაც არ გამორიცხავს.
“როდესაც იპოთეკურ რეგულაციებში ჩავდეთ პირობა, რომ თუ ადამიანს, ვინც ყიდულობს ბინას, აქვს მხოლოდ ერთი ბინა, რომელსაც ის ყიდულობს, ამ ბინის ჩადება არ შეუძლია უზრუნველყოფაში, ჩვენ შეიძლება გადავხედოთ ასეთი ტიპის გადაწყვეტილებებს. მაგალითად, ბევრი ახალგაზრდა ადამიანი, როგორც ვიცით, ცხოვრობს მშობლებთან, ისინი ყიდულობენ ბინას, ცხოვრობენ მშობლებთან. კიდევაც რომ მოხდეს რაღაც და ადამიანმა ეს ბინა დაკარგოს, ბოლოს და ბოლოს მშობელთან დაბრუნდება საცხოვრებლად” – აღნიშნავს მინისტრი.
