“სტრატეგია აღმაშენებლის” გენერალური მდივანი, პაატა მანჯგალაძე შარლ მიშელის დოკუმენტზე ხელმოწერის მნიშვნელობის თაობაზე საუბრობს და ოპოზიციონერ კოლეგებს “ქართული ოცნების” დასამარცხებლად ერთიანი ძალებით ბრძოლისკენ მოუწოდებს:
“ჩვენ გვქონდა ორი არჩევანი, ან რეალურად დაგვენახა პროცესი, გაგვეთვალისწინებინა ქვეყანაში შექმნილი ვითარება, ჩვენი საერთაშორისო გავლენიანი მეგობრების და პარტნიორების მოწოდება ან სახიფათო ზღვარზე გაჯიუტებული პოზიციებით ფეთქებად საშიშ მდგომარეობამდე მიგვეყვანა ჩვენი ქვეყანა. მარტივად რომ ვთქვათ, ჩვენ ან უნდა გვეხელმძღვანელა საქართველოს ინტერესების, ევროსაბჭოს პრეზიდენტის, ამერიკის სენატის, სახელმწიფო დეპარტამენტის რჩევით ან არარეალური წარმოდგენებით, ვიწრო პარტიული და პირადი ინტერესებით გვევლო ჭიჭინაძის მსგავსი იმ სხვა ოპოზიციური ლიდერების მოწოდებების გზით, რომლებიც სინამდვილეში ჩვენ იმის გაკეთებას გვაბრალებენ, რაც მათ არა ერთხელ გაუკეთებიათ და შანსი რომ ჰქონდეთ, კიდევ ერთხელ გაიმეორებდნენ.
ყველაფერი მარტივია, ან იღებ პასუხისმგებლობასა და რისკებს საკუთარ თავზე, რომ შეცვალო რეალობა ან უპასუხისმგებლოდ ისვრი ტალახს ყველა მიმართულებით იმ ვარაუდით, რომ მღვრიე წყალში იქნებ რამე მეტი სარგებელი ნახო.
მივიღოთ რეალობა და ამ რეალობაში ყველა უნდა ვკონცენტრირდეთ იმაზე, თუ რას ვაკეთებთ მოახლოებული არჩევნებისთვის, რომ ხელისუფლებამ ვერ შეძლოს გაყალბება და რაც შეიძლება დაბალი შედეგი დადოს.
ეს გამოიყვანს კრიზისიდან ქვეყანას და არა ირაციონალური წარმოდგენებით მამაცობანას თამაში, რომელსაც წლებია ყველა ერთად ვხედავთ“, – განაცხადა პაატა მანჯგალაძემ.
ინფორმაციას “სტრატეგია აღმაშენებლის” პრესსამსახური ავრცელებს
