,,სტრატეგია აღმაშენებლის“ სოციალური მიმართულების ხელმძღვანელი, თეონა ჭალიძე ძალადობის მსხვერპლთა მიმართებაში სახელმწიფო პოლიტიკის თაობაზე საუბრობს, თავშესაფრების ნაკლებობაზე ამახვილებს ყურადღებას და ხელისუფლებას სიტუაციის აუცილებელი გამოსწორებისკენ მოუწოდებს:
,,დღეის მდგომარეობით ქვეყნის მასშტაბით ფუნქციონირებს ძალადობის მსხვრეპლთა მომსახურების ხუთი დაწესებულება (თავშესაფარი). ჯამში ბენეფიციართა ლიმიტი 83.
აღსანიშნავია, რომ 2021 წლის 3 თვის განმავლობაში ძალადობის მსხვერპლთა თავშესაფრების მომსახურებით ისარგებლა 110-მა ბენეფიციარმა. ოჯახში ძალადობის შემთხვევების მზარდი მონაცემების გათვალისწინებით, თავშესაფრებზე მოთხოვნა შესაძლოა კიდევ უფრო გაიზარდოს, ხოლო შემდეგ ბენეფიციარების სოციალურ-ეკონომიკურ მდგომარეობაზეა დამოკიდებული რამდენად შეძლებენ საცხოვრებელი პირობების უზრუნველყოფას.
ხაზგასასმელია რომ საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტრო არ ფლობს ინფორმაციას ბენეფიციართა შესახებ, ჰქონდათ თუ არა სოციალურად დაუცველის სტატუსი, იღებდნენ თუ არა საარსებო შემწეობას და თავშესაფარში გადაყვანის შემდეგ შეუჩერდათ ან შეუწყდათ თუ არა საარსებო შემწეობა. აღნიშნულ მონაცემებს სამინისტრო არ ამუშავებს.
სტატისტიკას არ აწარმოებენ არც თბილისის მერიასა და რაიონული გამგეობების უმრავლესობაში. კითხვაზე თუ რამდენ ძალადობის მსხვერპლის სტატუსის მქონე პირს გაეწია დახმარება და რა სახის დახმარება იყო ეს, ინფორმაცია მოგვაწოდა მხოლოდ დიდუბის, საბურთალოს და ჩუღურეთის რაიონულმა გამგეობებმა. რაც შეეხება სხვა გამგეობებს აღნიშნული მიმართულებით სტატისტიკას არ აწარმოებენ. აღსანიშნავია ისიც, რომ მერიის ბიუჯეტით არ არის გათვალისწინებული მიზნობრივი პროგრამა რომლის ბენეფიციარებიც იქნებოდნენ ძალადობის მსხვერპლის სტატუსის მქონე პირები.
სტატისტიკის არწარმოება, მიზნობრივი პროგრამის არარსებობა, მონაცემების არდამუშავება ვფიქრობ მიუთითებს იმაზე, რომ განსაკუთრებულად მოწყვლად ადამიანებს ყურადღება სათანადოდ არ ექცევათ. მაგალითად საგამონაკლისო წესით ბინის ქირის გადახდა თავშესაფრიდან წამოსული ძალადობის მსხვერპლის სტატუსის მქონე პირისთვის ძალიან მნიშვნელოვანი საჭიროებაა და მხარდაჭერაა. ასევე მნიშვნელოვანია საარსებო შემწეობის შენარჩუნება თავშესაფარში გადაყვანილი სოციალურად დაუცველის სტატუსის მქონე ძალადობის მსხვერპლის სტატუსის მქონე პირისთვის. მნიშვნელოვანია ამ საკითხებზე დაფიქრება, მონაცემების დამუშავება, სტატისტიკის წარმოება და შესაბამისი ქმედითი ნაბიჯების გადადგმა ჯანდაცვის სამინისტროსა და ადგილობრივი თვითმმართველობის ორგანოების მხრიდან,“- აცხადებს თეონა ჭალიძე.
ინფორმაციას “სტრატეგია აღმაშენებლის” საზოგადოებასთან ურთიერთობის სამსახური ავრცელებს
