40 წელი გავიდა მას შემდეგ, რაც თბილისის “დინამომ” ისტორიული გამარჯვება იზეიმა. ეს იყო 1981 წლის 13 მაისს, როდესაც თბილისის “დინამომ” თასების მფლობელთა თასის ფინალში იენის “კარლ ცაისი” 2:1 დაამარცხა და ქართული ფეხბურთის ისტორიაში პირველად და ჯერჯერობით უკანასკნელად, ქართულმა კლუბმა ევროთასი მოიგო.
შეხვედრა გერმანიაში, ქალაქ დიუსელდორფში გაიმართა. ამ ისტორიულ შეხვედრას თბილისიდან ჩამოსული უამრავი გულშემატკივარი და ქართველი ემიგრანტი ესწრებოდა. ისინი მთელი მატჩის განმავლობაში ამხნევნებდნენ “დინამოს”.
ქართული დელეგაციის ხელმძღვანელი შოთა გორგოძე იხსენებდა:
“ფინალური შეხვედრის წინ აღმოვაჩინე, რომ მიუხედავად იმისა, რომ ჩვენი მეტოქე სოციალისტური, მაგრამ მაინც გერმანული კლუბი იყო, მასპინძელთა სიმპათიები თბილისის “დინამოსკენ” იხრებოდა. დიუსელდორფის “ფორტუნა” იმ გათამაშებაში მონაწილეობდა, მაგრამ ადრეულ სტადიაზე გამოვარდა. სამაგიეროდ ფინალში გავიდა მათი იდეოლოგიური მტრის წარმომადგენელი. ეს იყო ის უმთავრესი ფაქტორი, სტადიონი სანახევროდაც რომ არ შეივსო. ამის გამო მატჩამდე გარკვეული ფსიქოლოგიური უპირატესობა გაგვაჩნდა“.
მოედანზე გასვლამდე რამდენიმე წუთით ადრე, გუნდის გასახდელში, თბილისის “დინამოს” მთავარმა მწვრთნელმა, ნოდარ ახალკაცმა, მოთამაშეებს საქართველოს კათოლიკოს-პატრიარქის, ილია მეორის მიერ გამოგზავნილი წერილი წაუკითხა, რაც თურმე ძალიან დიდი მოტივატორი გამხდარა გუნდის წევრებისათვის. მათ პირობა დადეს, რომ აუცილებლად უნდა გაემარჯვათ. ამ შემართებით გავიდნენ სათამაშო მოედანზე.
63-ე წუთზე ანგარიში გერმანელებმა გახსნეს გერარდ ჰოპეს მიერ გატანილი გოლით. ამის საპასუხოდ 4 წუთში ვლადიმერ გუცაევმა ანგარიში გაათანაბრა. გამარჯვების გოლი კი 87-ე წუთზე ვიტალი დარასელიამ გაიტანა.
13 მაისის ღამეს ეროვნული ზეიმი გაიმართა მთელს საქართველოში. თბილისში ჩამოსულ მოთამაშეებს კი აეროპორტში საოცარი დახვედრა მოუწყვეს.
ამ ისტორიული გამარჯვებიდან 40 წელი გავიდა, თუმცა თავის ფასეულობასა და მნიშვნელობას 1981 წლის 13 მაისის თარიღი დღემდე არ კარგავს.
