პირველკლასელების რეგისტრაციის დაწყებას ეხმაურება “სტრატეგია აღმაშენებლის” პოლიტსაბჭოს წევრი, განათლების მიმართულების ხელმძღვანელი, ნანა ტოხვაძე და აცხადებს, რომ სფეროში არსებული ყველა პრობლემა თუ უბედურება უსისტემო და უპასუხისმგებლო გადაწყვეტილებების შედეგია:
“ყველა უბედურება რაც განათლებაში გვჭირს იმ უსისტემო და უპასუხისმგებლო გადაწყვეტილებების შედეგია, რომელშიც ბოლო წლებია აქტიურად მიგვაქანებს სახელისუფლება. კარგად ვერ მიხვდნენ, რომ მათი ვალდებულებაა ემსახურონ მოქალაქის საუკეთესო ინტერესს.
სახელმწიფოს ფულის სხვა წყარო არ აქვს, გარდა იმისა, რასაც ხალხი თავად გამოიმუშავებს. არ არსებობს სახელმწიფო ფული, არსებობს მხოლოდ გადასახადის გადამხდელთა ფული, რომელიც მიზნობრივად და უკეთესი პირობების შექმნას უნდა ხმარდებოდეს.
დღეს პირველკლასელთა რეგისტრაცია გამოცხადა, რომელიც ფორმალურად 5 ივნისამდე გრძელდება. რეალობა კი ისაა, რომ ბაზები თვალის დახამხამებაში შეივსო და მშობლები საკუთარ მუნიციპალიტეტში, უბნის საჯარო სკოლაში ვერ არეგისტრირებენ ბავშვებს.
პრაქტიკულად დიდგორის, შამქორისა და მარაბდის მსგავსი ბრძოლების გადახდა მოუწია მშობელთა ნაწილს და დასწრებაზე დარეგისტრირდა. ვინც ვერ შეძლო, ახლა მიდგომ-მოდგომის, „შინაურის“ გამონახვისა და განცხადებებით სირბილის ჯერია.
ვინმემ აქვს პასუხი, რატომ არ არის უპირატესი ბავშვის საუკეთესო ინტერესი? დროა, აღიარონ, რომ პროცესის რაციონალურ ჩარჩოებში მოქცევის ნაცვლად განათლების სისტემა უთავბოლო, ნეპოტისტურ-კორუფციულ ჭაობში იხრჩობა”, – აცხადებს ნანა ტოხვაძე.
