აეროპორტში პოლიტიკოს გიგი უგულავასა და ძიუდოში ევროპის ვიცე-ჩემპიონ ბადრი-საბა გავაშელიშვილს შორის მომხდარ ინციდენტთან დაკავშირებით დაწყებულ გამოძიებაზე 13 მაისს გიგი უგულავას სასამართლოა ჩანიშნული. პროკურატურა პოლიტიკოსს ბადრი-საბა გავაშელიშვილის ცემას ედავება.
გიგი უგულავა აღნიშნულ საკითხის კომენტირებისას აცხადებს, რომ ინციდენტი ხელისუფლების მიერ იყო დაგეგმილი, ბადრი-საბა გავაშელიშვილი კი – მათი მოგზავნილი. პოლიტიკოსმა აღნიშნული სასამართლო პროცესის განახლება ნიკა მელიას ციხიდან გამოსვლასაც დაუკავშირა:
„რაც ივანიშვილი მოვიდა ხელისუფლებაში, ჩემ წინააღმდეგ აღიძრა 8 სისხლის სამართლის საქმე, მაგრამ ეს თავისი კომიკურობითა თუ ტრაგიზმით – ძიუდოისტი რომ „ჩამიდეს“ აეროპორტში – ყველაზე სამარცხვინო იყო, ერთი მხრივ და მეორე მხრივ, საგანგაშო, იმიტომ, რომ შეუიარაღებელი თვალითაც ჩანს, რომ ეს კაცი იყო მოგზავნილი ხელისუფლების მიერ, მათ მიერ იყო ეს დაგეგმილი. და მერე საერთოდ, ბოლოს საქმე აღძრეს ჩემ წინააღმდეგ. ახლა უკვე წელიწადნახევარია გასული და 13 მაისს ჩაინიშნა სასამართლო.
სხვათა შორის, ამ მუხლს ოცნებამ ამნისტია გაუკეთა, უბრალოდ მსხვერპლის თანხმობა არის საჭირო, ანუ, აი იმ კაცმა, გავაშელიშვილმა თანხმობა უნდა თქვას, რომ ჩემზე გავრცელდეს ამნისტია. მე არავის თანხმობა არ მჭირდება, ეს იყო თავიდან ბოლომდე პოლიტიკური საქმე, როგორც სხვა დანარჩენი.
ფაქტია, რომ ივანიშვილს სხვანაირად არ შეუძლია. აი, გამოვიდა გუშინ მელია, წავიდა ახალი, გადაეცა ისე, როგორც ცეცხლი გადაეცემოდა სპარტაკიადაზე, გადაეცა ახლა ახალს, და მუდმივად ასე იქნება და ნუ შევიქმნით იმის ილუზიას, რომ რაიმე ხელშეკრულებით შეიძლება ამ ხელისუფლებამ თავისი ნირი და სტრატეგია შეცვალოს“, -აცხადებს გიგი უგულავა.
გიგი უგულავას თქმით, აეროპორტის შემთხვევა 20 ივნისის ღამეს უკავშირდება, როდესაც მან ბიძინა ივანიშლივს პირდაპირ ეთერში სიტყვიერი შეურაცხყობა მიაყენა. პოლიტიკოსი დარწმუნებულია, რომ აეროპორტის თავდასხმა და მისი დაკავება ბიძინა ივანიშვილის ანგარიშსწორებაა:
„ეს არის ჩვეულებრივი პოლიტიკური საქმე და ის უნდა იყოს გამოძიებული, სხვა შემთხვევაში, ამ ქვეყანაში არ დამთავრდება ეს. კიდევ ერთხელ ვიმეორებ, ეს ამბავი პირდაპირ უკავშირდება, მე ვიცი კიდეც შიგნიდან, ქართული ოცნებიდან, უკავშირდება 20 ივნისს. ამ დღეს, როდესაც მოლაპარაკება უნდა გამართულიყო, მე და ნიკა მელია უნდა წავსულიყავით და შევხვდეროდით გახარიას, რომ ჩაგვეცხრო სიტუაცია როგორმე. აი, ამის ნაცვლად დაიწყო მაშინ ტყვიების სროლა და გაზის გამოშვება, რის შემდეგადაც, მე ვთვლი, სრულიად სამართლიანად, ერთადერთი, რაც ეკუთნოდა ივანიშვილს, ეს იყო გინება მისი მისამართით და პირდაპირ ეთერში ვაგინე. შემდეგ, ახლა, გაიხსენეთ გინებებზე მათი რექცია, ის რაც გამოქვეყნდა, ახლა რაც ვნახეთ, ადამიანებსა და ბავშვებს რომ ატერორებენ ბერას აუგად მოხსენიების გამო. ამის გამო მოხდა მერე ეს თავდასხმა აეროპორტში და შემდეგ უკვე შარშან ჩემი დაკავება“, – აღნიშნა გიგი უგულავამ.
ავტორი
ნატალი ბაკურაძე
