“ეს არის საბჭოთა პერიოდში მიღებული კანონი, რომელიც გაჟღენთილია ნამგალი და უროს სულისკვეთებით” – კახა კოჟორიძე

1984 წელს მიღებულ, საქართველოს ადმინისტრაციულ სამართალდარღვევათა კოდექსში, შეტანილი ცვლილებების მიხედვით, პოლიციისათვის წინააღმდეგობის გაწევაზე ჯარიმები იზრდება და სანქციები მკაცრდება. პოლიტიკოსების ნაწილი პრეზიდენტ სალომე ზურაბიშვილისგან აღნიშნულ კანონპროექტზე ვეტოს დადებას ელის.

პარტიის „ლელო საქართველოსთვის“ პოლიტიკური საბჭოს წევრი, კახა კოჟორიძე, კომენტარს აკეთებს ამ საკითხთან მიმართებაში და აღნიშნულ საკანონმდებლო ცვლილებებში გამოხატვის თავისუფლების შეზღუდვას, საბჭოთა პერიოდისკენ გადადგმულ ნაბიჯს ხედავს, რის გამოც აუცილებლად მიაჩნია კანონპროექტისთვის ვეტოს დადება:

„ეს საკანონმდებლო ცვლილებები არის უაღრესად პრობლემატური. პირდაპირ ურტყამს გამოხატვის თავისუფლებას და საქართველოს მოქალაქეებმა, რომლებსაც შეიძლება რაიმე პოლიტიკური პროცესისადმი ჰქონდეთ ან გაუჩნდეთ პრეტენზია და გამოხატონ ეს საჯაროდ, შესაძლოა მიიღონ რამდენიმე ათას ლარიანი ჯარიმა.

იმის გათვალისწინებით, რომ ეს არის საბჭოთა პერიოდში მიღებული კანონი, რომელიც გაჟღენთილია ნამგალი და უროს სულისკვეთებით და რომელიც თანამედროვე, 21-ე საუკუნის საქართველოსთვის არის აბსოლუტურად არქაული და უკან გადადგმული ნაბიჯი ბრმა საბჭოეთში, მისთვის (პრეზიდენტისთვის – რედ.), როგორც ევროპული გამოცდილების მქონე პოლიტიკური ფიგურისთვის, მნიშვნელოვანი უნდა იყოს პოლიტიკური განაცხადის გაკეთება, რომ ეს მისთვის არის მიუღებელი და ვეტოს ადებს. ეს არის ჩემი პირადი პოზიცია, რაც მას ვუთხარი“, – აცხადებს კახა კოჟორიძე.

ავტორი
ნატალი ბაკურაძე