ფრაქცია „ქართული ოცნების“ წევრმა ირაკლი ქადაგიშვილმა პარლამენტის პლენარულ სხდომაზე განცხადება გააკეთა. მისი თქმით, დღევანდელი პარლამენტი გაცილებით უფრო მრავალფეროვანი და სრულყოფილია და შესაბამისად ამ პარლამენტში იქნება მწვავე დებატები, როგორც ოპოზიციასა და უმრავლესობას შორი, ასევე სხვადასხვა პოლიტიკურ ჯგუფებს შორის. რაც არის პარლამენტის ბუნებრივი მდგომარეობა და პოლიტიკური ბრძოლის ლოგიკა:
„ქართული ოცნება“ ვაკეთებთ მაქსიმუმს იმისათვის, რომ ქვეყანა არ აცდეს განვითარების იმ გზას, რაც საბოლოო ჯამში ჩვენს დამოუკიდებელ, დემოკრატიულ სახელმწიფოს მიიყვანს ცივილიზებულ ერთა ოჯახში.
გამომდინარე აქედან, იმ დოკუმენტშიც, რომელიც ამ, მე ვიტყოდი, ხელოვნურად შექმნილი კრიზისიდან გამოსასვლელად დადო ევროკავშირმა და ჰქვია „საქართველოს უკეთესი მომავლის გზა“, სწორედ ამ უკეთეს მომავალზეა ლაპარაკი და ძალიან მნიშვნელოვანი იქნება ახლა, რომ ამ დოკუმენტის შესრულებით და იმპლემენტაციით ვიყოთ ჩვენ მიერ გაკეთებული არჩევანის და ხელმოწერის ერთგულნი.
მე მესმის, რომ გარკვეული პარტია, გარკვეული პოლიტიკოსი თავისი შიდა დღის წესრიგიდან გამომდინარე ასახელებს პოლიტპატიმარს, არშემდგარ არჩევნებს, არარსებულ სასამართლო სისტემას, მაგრამ ეს დოკუმენტი ითვალისწინებს იმას, რომ საქართველოში პოლიტპატიმარი არ არის. გარკვეული ძალების მხრიდან არის ასოცირება ვიღაცის პოლიტიკური საქმიანობის გამო თითქოს სამართლებრივი დევნა აქვს; არის ასოცირება იმისა, რომ სამართალი არ არის ყოველთვის ობიექტური და ა.შ. ამიტომ, ეს არის დოკუმენტი, რომლის სულისკვეთებაცაა თუ როგორ შეგვიძლია დღევანდელი მდგომარეობის გაუმჯობესება.
და ის, რომ, ოპოზიციას ძალიან ბევრი რამე აქვს გასაკეთებელი, რომ პოლიტიკურად მან ამომრჩეველის ნდობა ისევ მოიპოვოს, ეს გამოჩნდება ადგილობრივი თვითმმართველობის არჩევნების დროს. „ქართულ ოცნებას“, რა თქმა უნდა, თავისი ამოცანა აქვს, თავისი გარკვეული საარჩვენო ზღვარი აქვს გადასალახავი, მაგრამ მეორე მხრიდანაც შევხედოთ, ოპოზიციასაც აქვს თავის 58% დადებითი ხმები არჩვენებში მისაღები. ამიტომ არჩევნებს და რეფერენდუმს ნუ ავურევთ ერთმანეთში და ვიყოთ ამ კონკრეტულ შემთხვევაში ამ ევროპული შეთანხმების ერთგულნი.
რა თქმა უნდა, პოლიტიკური ოპონირება ჩვენ შორის ყოველთვის იქნება და იყოს ეს ოპონირება კონსტრუქციული, არა ფაქტების მანიპულირებაზე დამყარებული, არამედ დამყარებული რეალობაზე და უკეთესი მომავლის ხედვაზე“, – განაცხადა ირაკლი ქადაგიშვილმა.
ინფორმაციას პარლამენტის საზოგადოებასთან ურთიერთობისა და ინფორმაციის დეპარტამენტი ავრცელებს
