“ზოგიერთებს ხელის დაბანა გინდათ პილატესავით, ტალახი და პასუხისმგებლობა ჩვენ გინდათ აგვკიდოთ და მერე თეთრ ცხენზე ამხედრებულნი, “სუფთა სინდისით”, გმირულად შეჯლიგინდეთ პარლამენტში” – ლაშა დიაროვი

“სტრატეგია აღმაშენებლის” პოლიტსაბჭოს წევრი, პარტიის ახალგაზრდული მიმართულების ხელმძღვანელი ლაშა დიაროვი, ამნისტიის კანონპროექტის მომზადების პროცესში, ცალკეული პარტიებისა და პოლიტიკოსების მხრიდან გამოთქმულ მწვავე პოზიციებს ეხმიანება, პუნქტობრივად აყალიბებს თავის შეფასებებს კანონთან მიმართებაში და მის განსაკურებულ მნიშვნელობაზე ამახვილებს ყურადღებას:

“რამდენიმე მნიშვნელოვანი ფაქტი ამნისტიასთან დაკავშირებით.

1. შეთანხმებაში წერია ამნისტიისა და გირაოს გამოყენება ერთდროულად. ესაა დასავლეთის მტკიცე პოზიცია, მათ მელიას საკითხის დახურვა სურთ და არ უნდათ, რომ ხელისუფლებას კიდევ ჰქონდეს ამ საკითხის ხელახლა წამოწევის შანსი. შესაბამისად ამნისტიის გამოყენება დასავლეთის მტკიცე პოზიციაა, გირაო კი იყო საშუალება მელიას ციხიდან გამოსვლის დაჩქარებისა, ეს ორი ცალკ-ცალკე თავიდანვე არ განიხილებოდა!

2. ამნისტია არ გავრცელდება პოლიტიკური თანამდებობის პირებზე და 20 ივნისის შემოქმედებზე;

3. ამნისტია არ გავრცელდება ასევე არც იმ პირებზე, ვის მიმართაც საქმე აქამდე არ აღძრულა;

4. ამნტისტია არ და ვერ გავრცელდება ასევე კონვენციით დაცული მუხლებით ბრალდებულ პირებზე;

5. საიას სტრასბურგში გასაჩივრებული აქვს არასწორი კვალიფიკაციის გამო წარმოებაში უკვე არსებული საქმეები და ითხოვს ამ საქმეებზე კვალიფიკაციის შეცვლას. კვალიფიკაცია არის არასწორი და შესაცვლელია, შეცვლის შემდგომ აღნიშნული ქმედებები დაკვალიფიცირდება კონვენციით დაცული მუხლებით. (მკვლელობის მცდელობით, ჯანმრთელობის განზრახ მძიმე დაზიანებით ან პიროვნების ღირსების შელახვით) შესაბამისად ამ ქმედებების სწორი კვალიფიკაციის შემდეგ მათზე ამნისტია ვერ განხორციელდება;

6. ნუ შევიყვანთ მოსახლეობას შეცდომაში. ამნისტია არ გავრცელდება კონვენციით დაცულ მუხლებზე. ხელისუფლების შეცვლის შემდეგ, ნორმალური პროკურატურის პირობებში აღნიშნულ ქმედებებს მიეცემა სწორი კვალიფიკაცია, რომელზეც ამინისტია ვერ და არ გავრცელდება და ყველა დამნაშავე უმკაცრესად აგებს კანონის წინაშე პასუხს.

პ.ს. ვიცი, რომ ზოგიერთებს ხელის დაბანა გინდათ პილატესავით, ტალახი და პასუხისმგებლობა ჩვენ გინდათ აგვკიდოთ და მერე თეთრ ცხენზე ამხედრებულნი, “სუფთა სინდისით”, გმირულად შეჯლიგინდეთ პარლამენტში, ეგრე არ გამოვა ძმაო. პასუხიგებლობის აღება არ გსურთ, გასაგებია, ჩვენ ავიღეთ ეს პასუხისმგებლობა და გვაცადეთ ბატონო თქვენი გასაკეთებელი საქმის გაკეთებაც“, – წერს ფეისბუქის პირად გვერდზე ლაშა დიაროვი.