ოპოზიციის ცალკეული წარმომადგენლების განმარტებით, ხელისუფლება ამნისტიის კანონის საკუთარი მიზნებისთვის გამოყენებას ცდილობს, რათა სამართლებრივი პასუხისმგებლობა თავიდან აირიდოს. „ერთიანი ნაციონალური მოძარაობის“ პოლიტსაბჭოს წევრი აკაკი მინაშვილი, ჟურნალისტებთან საუბრისას აცხადებს, რომ ხელისუფლების მხრიდან მსგავსი ქცევა მოსალოდნელი იყო:
„ნიკა მელიას პოზიცია არის ძალიან ცალსახა, რომ ამნისტიის კანონი არ უნდა გავრცელდეს სამართალდამცავებსა და მაღალი თანამდებობის იმ პირებზე, რომლებმაც ბრძანება გასცეს ან გამოიჩინეს ძალადობა ჩვენი მოქალაქეების წინააღმდეგ. ძალიან მარტივად პროგნოზირებადი იყო, რომ ჩვენი ხელისუფლება ასე მოიქცეოდა და შეეცდებოდა, ამნისტია გამოეყენებინა საკუთარი მიზნებისათვის. მათ ძალიან კარგად იციან, რომ ჩაიდინეს მძიმე დანაშაული, გამოიყენეს ძალა მოქალაქეების წინააღმდეგ, შეასრულეს გავრილოვისა და ლავროვის ბრძანება, ახლა კი ცდილობენ, რომ ეს პროცესი გამოიყენონ და აირიდონ პასუხისმგებლობა“, – განაცხადა აკაკი მინაშვილმა.
