“სტრატეგია აღმაშენებლის” ლიდერი, გიორგი ვაშაძე, ჟურნალისტებთან კონკრეტულ განმარტებებს აკეთებს ამნისტიის კანონთან დაკავშირებით:
“ამნისტიის კანონისთვის არის მაქსიმალურად მოკლე ვადა და შევეცდებით, რომ იმ ვადაში იყოს ყველაფერი გაკეთებული. იქნება საკომიტეტო მოსმენები, იქნება ყველაფერი, როგორც ეს პროცედურას სჭირდება. 3 პლენარული სესია, 3 საკომიტეტო მოსმენა, რაც ეს სჭირდება ნებისმიერ კანონპროექტს და მივიღეთ ჩვენ თანხმობა პარლამენტის თავმჯდომარე ბატონი თალაკვაძისგან, რომ მაქსიმალურად შემჭიდროვებულ ვადებში მოხდება ამ კანონის მიღება.
ჩემი მიზანია შეთანხმება, რომელიც უნდა ხალხს და რომელიც შედგა, ასეთი მაღალი რანგის ადამიანის ვიზიტიდან გამომდინარე და მისი უშუალო მონაწილეობით, რაც შეიძლება სწრაფად იყოს იმპლიმენტირებული. გარდა ამ საკითხებისა, არის საკონსტიტუციო ცვლილებები მოსამზადებელი, საკანონმდებლო ცვლილებები დასაწერი და რაც მთავარია, ბევრი რამ არის გასაკეთებელი. დრეიდან, კიდევ ერთხელ, ყველას მოვუწოდებ, ლანძღვა-გინების ნაცვლად პროფესიულ დისკუსიაზე გადავიდეთ, ეს სჭირდება დღეს საქართველოს.
რაც შეეხება, ამნისტიის კანონს და დამნაშავე პოლიციელებს, მე პირდაპირ გეტყვით, რომ ამაზე ვიმსჯელებთ კიდევ, მაგრამ ღიად და გულწრფელად გეუბნებით, ჩემთვის დამნაშავე არის არა პოლიციელი, რომელმაც კონკრეტული ქმედება ჩაიდინა, არამედ ის, ვინც დავალება გასცა ამ უკანონო ქმედებებზე. კანონი შეეხება მხოლოდ იმ ადამიანებს, ვინც უკვე არის სისხლის სამართლის პასუხისგებაში მიცემული და ვიცით რა მუხლით. იმ ადამიანებს, ვინც არაა დღეს პასუხისგებაში, არ შეეხება. შესაბამისად – მთავარი კითხვა, ვინც მიიღო გადაწყვეტილება, დაწყებული გახარიადან, დაწყებული ბევრი ადამიანიდან – არ შეეხება და ვერ შეეხება ამნისტიის კანონი! ამაზეც შევთანხმდით,” – განაცხადა გიორგი ვაშაძემ.
