ქართველი კლასიკოსი მწერალი, გურამ დოჩანაშვილი 82 წლის ასაკში გარდაიცვალა. ჯანმრთელობის მდგომარეობის დამძიმების გამო, დოჩანაშვილი კლინიკა ,,ნიუ ჰოსპიტალში’’ მკურნალობდა.
თანამედროვეობის ერთ-ერთი უდიდესი ქართველი შემოქმედი, 1939 წლის 26 მარტს, ქალაქ თბილისში დაიბადა. 1966 წელს გამოიცა მისი პირველი წიგნი ,,მთის გადაღმა’’, პირველი მოთხრობები კი ჟურნალ ცისკარში, 1961 წელს დაიბეჭდა.
ის გახლავთ ავტორი ისეთი ცნობილი მოთხრობებისა, როგორებიცაა: „კაცი რომელსაც ლიტერატურა ძლიერ უყვარდა“,“ მხოლოდ ერთი კაცი“ ,“ კეჟერაძეები“. თანამედროვე კლასიკოსის კიდევ ერთი ყველასთვის ცნობილი ნაწარმოებია, „სამოსელი პირველი“, რომელიც 1975 წელს გამოიცა.
ლიტერატურის განვითარებაში შეტანილი განსაკუთრებული წვლილისთვის მწერალს მიღებული აქვს ლიტერატურული პრემია ,,საბა’’, 2020 წლის 3 ოქტომბერს კი თბილისის საპატიო მოქალაქის წოდება მიენიჭა.
გურამ დოჩანაშვილის მთავარი თემებია სიყვარული, სიკეთე, შეუპოვარი ბრძოლა ბოროტების წინააღმდეგ და თავისუფლებისკენ სწრაფვა. გურამ დოჩანაშვილის შემოქმედება თარგმნილია მრავალ ენაზე, მისი ნაწარმოებები საფუძვლად დაედო ცნობილ კინოფილმებსა და ტელესპექტაკლებს.
ავტორი
ნინო დავითაძე
