,,სტრატეგია აღმაშენებლის” ლიდერმა გიორგი ვაშაძემ ევროპელ მედიატორთან შეხვედრის შემდეგ მოლაპარაკებების მიმდინარეობის თაობაზე შეფასებები გააკეთა და აღნიშნა, რომ განიხილება ყველა საკითხი, რომელიც იყო 6-პუნქტიან დოკუმენტში, ხოლო დღის ბოლომდე არის მოლოდინი, ,,ქართული ოცნების” მხრიდან იქნება კონკრეტული პოზიციები:
,,საზოგადოებას მინდა ვუთხრა, რომ პროგრესი ნამდვილად გვაქვს განხილვებში, მაგრამ ჯერ არ არის ეს ის ნიშნული, რაზეც შეთანხმება შეიძლება შედგეს. ეს უნდა ვიცოდეთ ყველამ.
შინაარსობრივ დეტალებზე ვერ ვისაუბრებ, მაგრამ კიდევ ერთხელ ხაზს ვუსვამ, რომ გარკვეული პროგრესი გვაქვს, რაც მე პოზიტიურად განმაწყობს, რომ დღეს დღის ბოლომდე, სადამდეც ალბათ 1 ან 2 შეხვედრა გვექნება, რაღაც გარკევული საკითხები კიდევ დაზუსტდება და კიდევ შეიძლება დაახლოვდეს მხარეების პოზიცია.
მთავარი ის არის, რომ დიდი მადლობა ჩვენს ევროპელ და ამერიკელ მეგობრებს, რომელთა ეგიდითაც მიდის ეს, როგორც მე ვუწოდე 48 საათიანი ბლიც მოლაპარაკებები, 5 თვის შემდეგ, რომელიც ჩვენ გვქონდა.
ვფიქრობ, რა თქმა უნდა, ყველას უნდა გვქონდეს რაციონალური პოზიცია – თითოეულ ჩვენგანს, თითოეულ პოლიტიკურ პარტიას. იმედი მაქვს, დღის ბოლომდე იმ საკითხებზე, რაც დარჩა კიდევ, ჩვენ ვიხილავთ რაღაც ახალ პოზიციებს ,,ქართული ოცნების” მხრიდან.
ასევე, ხაზი მინდა გავუსვა დოკუმენტზე, რაზეც ვმუშაობდით ეს არის არა მხარეების დოკუმენტი, არამედ უკვე ევროკავშირისა და აშშ-ს მიერ დადებული საბაზისო დოკუმენტი, რის გარშემოც მიდის მუშაობა. აქ ფუნდამენტური განსხვავებაა თვითონ მოლაპარაკების შინაარსში, რაც ვფიქრობ, რომ ერთ-ერთი გარდამტეხი იქნება მოლაპარაკებებში.
განიხილება ყველა საკითხი, რომელიც იყო 6-პუნქტიან დოკუმენტში, განიხილება პოლიტპატიმრების საკითხი, განიხილება საარჩევნო რეფორმის ფუნდამენტური საკითხი, განიხილება ახალი არჩევნების საკითხიც, როგორ შეიძლება მივიდეთ რიგგარეშე არჩევნებამდე და ველოდებით პასუხს“, – განაცხადა გიორგი ვაშაძემ.
ავტორი
ნინი ხიჯაკაძე
