პარლამენტის განათლების კომიტეტის თავმჯდომარე, იუსტიციის ყოფილი მინისტრი, თეა წულუკიანი მედიაში გავრცელებული აუდიოჩანაწერების ფაქტს ეხმიანება და მიაჩნია, რომ “ნაციონალური მოძრაობა” ცდილობს ამ უკანონო ჩანაწერებით ქვეყანაში არეულობა შექმნას:
“მაგალითად, მე რომ ვიყო პროკურორი, გამოვიძიებდი სწორედ იმას, თუ ვინ ჩაიწერა უკანონოდ არასრულწლოვანი ბერა ივანიშვილი, რა მიზნით ჩაიწერა, შემდეგ როგორ მოხვდა ეს ჩანაწერი იქ, სადაც მოხვდა ანუ რომელიღაც ერთ პარტიულ ტელევიზიაში, რა მიზნით დამონტაჟდა ასე უსინდისოდ და რა მიზანს ისახავდა. ეს ძალიან მნიშვნელოვანია.
“ნაციონალური მოძრაობა” ვერ მოდის ხელისუფლებაში სწორედ ამიტომ და ეს კარგად უნდა გაიგონ. დღესაც ისინი დგანან ვანოს საქმიანობაზე, დღესაც ისინი დგანან მეგის ქარდავას საქმიანობაზე. აქვთ რაღაც უკანონო ჩანაწერები, ამას ჭრიან-კერავენ და შემდეგ ცდილობენ მიაღწიონ მთავარ მიზანს, რომ ქვეყანაში შეიქმნას არეულობა,” – ცხადებს თეა წულუკიანი.
