მამუკა მდინარაძე ქვეყანაში შექმნილ მდგომარეობასთან დაკავშირებით კონკრეტულ შეფასებებს აკეთებს და მიაჩნია, რომ ოპოზიცია, მოლაპარაკებების პროცესში, კომპრომისული ნაბიჯების გადმოდგმის ნაცვლად ფარული ჩანაწერებით ცდილობს ხალხის გაბრაზებას:
“ოპოზიციამ ბუნებრივია იცოდა, რომ გუშინ ქვეყნდებოდა ეუთო/ოდირის საბოლოო და ძალიან პოზიტიური დასკვნა 2020 წლის საპარლამენტო არჩევნების შესახებ.
იციან, რომ მათი მხრიდანაც გადმოსადგმელია ერთი კომპრომისული ნაბიჯი მაინც. მათი ნაწილი განიხილავს კიდეც ასეთი წინადადების უახლოეს დღეებში დაყენებას.
და რას აკეთებს ,,ის’’, ვისაც შეთანხმების გაგონებაც არ უნდა – შავი არქივიდან იღებს ძველ ფარულ ჩანაწერებს, ჩეხავს, ამონტაჟებს, ცვლის კონტექსტს, შინაარსს და ამ გაყალბებული რეალობით ხელახლა ცდილობს ხალხის გაბრაზებას, – რადგან წინა რამდენიმე მცდელობამ არ გაამართლა.
სახელი: საინფორმაციო ტერორი საბჭოთა, ,,კაგებეშნიკური” მეთოდებით საკუთარი მოსახლეობის წინააღმდეგ.მიზანი: მოლაპარაკების ჩაშლა, რევანში, სახელმწიფოს ჩამოშლა და ხელისუფლების ხელში ჩაგდება.
შედეგი: მორიგი წარუმატებელი მცდელობა.
P.S.
ამის მიუხედავად (ქვეყნის, საზოგადოების ინტერესებიდან და ჩვენი დასავლელი პარტნიორების მკაფიო პოზიციიდან გამომდინარე, რომელსაც ძალიან ვაფასებთ), არ ვაპირებთ რადიკალიზაციაში ჩაყოლას.
მოლაპარაკების მაგიდასთან ველით მათ თუნდაც ერთ კომპრომისულ წინადადებას.
ქვეყანა აგრძელებს სტაბილურ, დემოკრატიულ განვითარებას და სწრაფვას ევროპული ოჯახის სრულფასოვანი წევრობისაკენ. ამას წინ ვერანაირი “კარგად გადაფუთული” ტყუილები ვერ დაუდგება!” – წერს მამუკა მდინარაძე ფეისბუქის საკუთარ გვერდზე.
