„საარჩევნო რეფორმის ახალი პაკეტი არის ეუთოს რეკომენდაციების მიხედვით შემუშავებული, სადაც მთელი რიგი მნიშვნელოვანი ცვლილებები არის გათვალისწინებული – რეფორმებთან დაკავშირებით, ჩვენს პირობას ვასრულებთ და ეს პაკეტი ინიცირდება“,- ამის შესახებ საქართველოს პარლამენტის თავმჯდომარემ ბიუროს სხდომაზე განაცხადა.
არჩილ თალაკვაძემ ოპოზიციას სამუშაო პროცესში ჩართვისკენ მოუწოდა და აღნიშნა, რომ იმ შემთხვევაში, თუ ოპონენტებს განხილვებში მონაწილეობის მიღება სურთ, პროცესი, სამი განხილვის ფარგლებში, ამისათვის ღია იქნება:
„საზოგადოებას კიდევ ერთხელ შევახსენებ, რომ მეცხრე მოწვევის პარლამენტში სწორედ მმართველმა გუნდმა უზრუნველყო ისეთი ფუნდამენტური ცვლილებების განხორციელება, როგორიცაა საარჩევნო სისტემის ცვლილება, პარტიების დაფინანსების ახალი წესი, გენდერული კვოტები და სხვა. ეს ყველა წინა ადმინისტრაციის და წინა ხელისუფლების დროს იყო გაცხადებული და არასოდეს გაკეთებულა – ოპოზიციის ყველა თაობის სურვილის მიუხედავად ასეთი რეფორმები არასოდეს გაკეთებულა” – განაცხადა არჩილ თალაკვაძემ.
პარლამენტის თავმჯდომარემ იმ სიახლეებზეც ისაუბრა, რომელსაც ცვლილებების პაკეტი ითვალისწინებს და ოპოზიციას საპარლამენტო საქმიანობაში ჩართვისკენ კიდევ ერთხელ მოუწოდა. მისი თქმით, მუშაობაში ოპოზიციის მონაწილეობა ფუნდამენტური პირობაა დეესკალაციისა და პროცესების ნორმალურ პოლიტიკურ დღის წესრიგში გადასვლისთვის.
„გუშინ საინტერესო დისკუსია გაიმართა ატლანტიკური საბჭოს ორგანიზებით, სადაც ჩვენმა პარტნიორებმა პირდაპირ თქვეს და მათ შორის, ქართველმა მონაწილეებმაც ოპოზიციიდან, რომ ბოიკოტი ეს იყო შეცდომა. ჩვენ ყოველთვის ამას ვამბობდით, რომ დემოკრატია მოითხოვს მონაწილეობას და მონაწილეობაზე უარის თქმა არის დემოკრატიული პროცესის წინააღმდეგ გადადგმული ნაბიჯი.
აქვე მინდა, გამოვეხმაურო რამდენიმე ზედაპირულ კომენტარს, რომელიც ოპოზიციის წარმომადგენლებისგან მოვისმინე – თითქოს პარლამენტში ოპოზიციის ჩართვა და საპარლამენტო სივრცეში პოლიტიკის დაბრუნება აღარ არის საჭირო და მნიშვნელოვანი. მინდა, პირდაპირ ვუთხრა ჩვენს საზოგადოებას – რომ მოლაპარაკებების დღის წესრიგში ამავე ოპოზიციის მიერ დაყენებული საკითხებიდან მინიმუმ ორი მოითხოვს მათ ჩართვას და მონაწილეობას საპარლამენტო პროცესში. სხვანაირად, უბრალოდ, შეუძლებელია იმ პირობების განხორციელება, თუ ამ პირობებზე შეთანხმება შედგება დიალოგის პროცესში.
საპარლამენტო პროცესში ოპოზიციის სრულფასოვანი მონაწილეობა არის ერთ-ერთი ფუნდამენტური პირობა, რომ მოხდეს დეესკალაცია და პროცესები გადავიდეს ნორმალურ პოლიტიკურ რეჟიმში“, – განაცხადა არჩილ თალაკვაძემ.
ინფორმაციას პარლამენტის საზოგადოებასთან ურთიერთობისა და ინფორმაციის დეპარტამენტი ავრცელებს.
