“მე მივიღე გადაწყვეტილება, გადავდგე დაკავებული თანამდებობიდან” – გიორგი გახარია

საქართველოს პრემიერ-მინისტრმა საგანგებო ბრიფინგზე საკმაოდ მოულოდნელი განცხადება გააკეთა გადადგომის თაობაზე. გიორგი გახარია იმედოვნებს, რომ მისი ეს ნაბიჯი ხელს შეუწყობს ქვეყნის პოლიტიკურ სივრცეში პოლარიზაციის შემცირებას:

,,გუშინ საქართველოს სასამართლომ ბატონ მელიას აღკვეთი ღონისძიების სახედ პატიმრობა შეუფარდა. ეს გახლავთ ადამიანი, რომელიც დიდად არასოდეს არ სცემდა პატივს ქართულ კანონმდებლობას და ეს გახლავთ ადამიანი, რომელიც 20 ივნისს მოუწოდებდა ჩვენს მოქალაქეებს პარლამენტის შტურმისკენ. ის იყო ერთ-ერთი ორგანიზატორი პარლამენტში შეჭრის.

მიუხედავად ყველაფრისა, ჩემი აბსოლიტურად ურყევი პოზიციაა, რომ ერთი კონკრეტული ადამიანის მიმართ, თუნდაც კანონიერი მართლმსაჯულებით განსაზღვრული ღონისძიების აღსრულება, თუ ეს რისკს უქმნის ჩვენი მოქალაქეების ჯანმრთელობას, სიცოცხლეს ან, საერთოდ, ქვეყანაში ქმნის პოლიტიკური ესკალაციის შესაძლებლობას, არის მიუღებელი.

დღეს განსაკუთრებით, როდესაც ჩვენს ქვეყანაში პოლიტიკური დაძაბაბულობა და პოლარიზაციაა, თვითონ ქვეყნის განვითარების და შემდგომ ქვეყნის უსაფრთხოების და მომავლის რისკებს ქმნის, როდესაც ჩვენ ყველანი ერთად, ჩვენს მოქალაქეებთან ერთად ვებრძვით გლობალურ პანდემიას, პოლიტიკურ კრიზისს, რეგიონალურ გამოწვევებს და რაც მთავარია, ჩვენ ყველანი ერთად ვებრძვით პოლარიზაციას, რათა უკეთესი მომვალი შევუქმნათ ჩვენს შვილებს. ასეთი ღონისძიება უნდა ჩატარდეს მხოლოდ მაშინ, როდესაც გადაზღვეული იქნება ყველა სახის რისკები, როდესაც არ იარსებებს არანაირი რისკი, არც ერთი მიუხედავად, პოლიტიკური მიზანშეწონილობასა ან პოლიტიკური ორიენტაციისა, თითოეული ჩვენი მოქალაქის და რაც ყველაზე მნიშვნელოვანია, არ შექმნის ქვეყანაში ესკალაციის არანაირ საფუძველს.

იქიდან გამომდინარე, რომ მე, სამწუხაროდ, ჩემს გუნდთან ერთად ვერ მივაღწიე ერთობლივ აზრს ამ საკითხთან დაკავშირებით, მე მივიღე გადაწყვეტილება, გადავდგე დაკავებული თანამდებობიდან.

რა თქმა უნდა, მე მჯერა და მინდა მჯეროდეს, რომ ეს ნაბიჯი ხელს შეუწყობს ჩვენი ქვეყნის პოლიტიკურ სივრცეში პოლარიზაციის შემცირებას. რამე თუ დარწმუნებული ვარ იმაში, რომ პოლარიზაცია და დაპირისპირება ჩვენს შორის არის ყველაზე დიდი რისკი ჩვენი ქვეყნის მომავლის, ეკონომიკური განვითარების და ყველა სახის კრიზისის გამკლავებისთვის“, – განაცხადა გიორგი გახარიამ.

ავტორი
ნინი ხიჯაკაძე