18 მარტის სხდომა იურიდიულ საკითხთა კომიტეტზე კიდევ ერთი დაპირისპირებით მოექცა ყურადღების ცენტრში. ვანო ზარდიაშვილთან დაპირისპირების გარდა, ეკა ბესელიას “საქმის გარჩევები” კომიტეტის ახალ ხელმძღვანელთან ანრი ოხანაშვილთან და მის მოადგილ დავით მათიკაშვილთანაც ჰქონდა.
“დამშვიდდით ბიჭებო, დამშვიდდით, სამ ხმაში ნუ მელაპარაკებით, დამშვიდდით. “პატარა” არ არის მარტო სიმაღლის განმსაზღვრელი, არის ბევრი რამის განმსაზღვრელი, ამიტომ ისე ნუ დაპატარავდებით, რომ ზღვის დონეზე დაბლა დავიდეს ადამიანის ღირსება. და იმ დონეზე თუ დახვალთ იქამდე ვერ ჩამოგყვებით, მაგრამ რაღაცა დონიდან აუცილებლად მომიწევს პასუხების გაცემა. ამიტომ, ანრი, ვიდრე ასეთი ყალბი დამაჯერებლობით, ეხლა იქედან დაგველაპარაკები, ცოტა პაუზა გააკეთე, ცოტა გაიაზრე სადა ხარ, სად ლაპარაკობ და მერე რაღაცა სიდინჯის მაგვარი რომ შემოგეპარება, ცოტა უფრო ნორმალური გახდება ეს დიალოგი” – მიმართა ბესელიამ ანრი ოხანაშვილსა და დავით მათიკაშვილს.
ბესელიას ეს ნათქვანი თავისი გადასახედიდან შეაფასა მათიკაშვილმა და განაცხადა, რომ არგუმენტების არქონის გამო გადაგის ეკა ბესელია შეურაცხყოფებზე:
“შეურაცხყოფები მოდის მაშინ, როდესაც არგუმენტები იკლებს, ქალბატონო ეკა. ძალიან გთხოვთ კორექტული იყავით“.
რაზეც ეკა ბესელიამ უპასუხა:
“დაიმშვიდეთ ნერვები, ორივემ. დათო, ტყუილად გამეცადინებდი სხდომის წაყვანაში?! ასე უნდა მოიქცე?!”
შეგახსენებთ, რომ იურიდიულ საკითხთა კომიტეტის სხდომაზე განიხილებოდა უზენაესი სასამართლოს მოსამართლეთა კანდიდატების წარდგენისა და არჩევის პროცედურის თაობაზე საპარლამენტო უმრავლესობის წევრების მიერ მომზადებულ საკანონმდებლო პაკეტი, რასაც კომიტეტმა მხარი დაუჭირა.