სტატისტიკის ეროვნული სამსახურის მიერ გამოქვეყნებულ მონაცემების შეფასებისას “სტრატეგია აღმაშენებლის” პოლიტსაბჭოს წევრი, სოციალური მიმართულების ხელმძღვანელი, თეონა ჭალიძე ყურადღებას ამახვილებს ცალკეული პროდუქტების გაძვირების ფონზე სოციალურად დაუცველის სტატუსის მქონე პირთათვის მცირე, მაქსიმუმ 60-ლარიანი შემწეობის განსაზღვრასა და მათ მძიმე ყოფაზე:
“„საქსტატის“ მონაცემებით, ერთი წლის განმავლობაში ზეთი 27%-ით, თევზეული 10%-ით, რძის ნაწარმი 9%-ით, პური 7.5%-ით გაძვირდა.
პარალელურად ბოლო ერთი წლის განმავლობაში 100 000 ადამიანით გაიზარდა იმ სოციალურად დაუცველის სტატუსის მქონე პირთა რაოდენობა, რომელთა ერთადერთი შემოსავალი საარსებო შემწეობაა და ამ დროისთვის ოფიციალური სტატისტიკით ასეთი 524598 ადამიანია.
იმ ფონზე, როცა ეს შემწეობა მაქსიმუმ 60 ლარია და ამ მიმართულებით არანაირი ზრდა არ მომხდარა, ფასების ზრდა პირველადი საჭიროების პროდუქტზე კიდევ უფრო ამძიმებს მათ მდგომარეობას.
იმ თვითდასაქმებულების ყოფა ვინც სამსახური დაკარგა, პანდემიის გამო და სახელმწიფოსგანაც ვერანაირი დახმარება ვერ აიღო (მაგ: ძიძები, დამხმარეები და სხვა), გაჩერებული ტრანსპორტის გამო, განსაკუთრებით დამძიმდა.
ფასები გაიზარდა ბავშვთა კვების ხაზსა და მედიკამენტებზეც.
ყველაზე მეტად ხელისუფლებამ ისევ ყველაზე გაჭირვებულ ადამიანებს დააჭირა წიხლი.
გულწრფელად მაინტერესებს 60 ლარი ერთი დღე მაინც თუ გეყოფათ საცხოვრებლად… მაშინ 30 დღე საარსებოდ რატომ დაუწესეთ ადამიანებს მხოლოდ 60 ლარი? რას შევიძენთ 60 ლარად?” – წერს ფეისბუქის პირად გვერდზე თეონა ჭალიძე.
