აშშ-ში, კაპიტოლიუმის შენობაში, ტრამპის მომხრე დემონსტრანტების შეჭრამ, მთელი მსოფლიო შოკში ჩააგდო. ფაქტს წინ უსწრებდა მოქმედი პრეზიდენტის, დონალდ ტრამპის უკმაყოფილება და პროტესტი, რადგანაც მიაჩნდა, რომ ქვეყანაში გაალბდა არჩევნების შედეგები და მას გამარჯვება “წაართვეს”.
აღნიშნულთან დაკავშირებით, სენატის საგარეო საქმეთა კომიტეტის თავმჯდომარის მოადგილემ, ჯინ შაჰინმა, კონგრესში სიტყვით გამოსვლისას, გაიხსენა საქართველოში კომიტეტის თავმჯდომარესთან, ჯეიმს რიშთან ერთად 2012 წლის არჩევნებში დასაკვირვებლად ჩამოსვლა და მათი შეხვედრა საქართველოს მე-3 პრეზიდენტთან, მიხეილ სააკაშვილთან. სენატორი იხსენებს, რომ სააკაშვილთან ერთად განიხილეს ხელისუფლების მშვიდობიანი გადაბარების საკითხი, რაც საყურადღებო ფაქტი იყო და აღნიშნული აუცილებელია ამერიკის შეერთებული შტატებისთვისაც:
„ის რაც დღეს ხდება, მხოლოდ ამერიკის შეერთებული შტატების პრობლემა არაა, იგი მთელ მსოფლიოში ახალგაზრდა დემოკრატიების პრობლემაცაა. როგორც სენატორმა რომნიმ აღნიშნა, ისინი ჩვენ შეგვცქერიან, როგორც მაგალითს, ჩვენ ვართ ბრწყინვალე ქალაქი ბორცვზე.
ამ შენობაში მყოფთაგან ბევრის მსგავსად, მეც ვმოგზაურობდი მთელს მსოფლიოში, განვითარებადი დემოკრატიის ქვეყნებში – ავღანეთიდან და ერაყიდან დაწყებული, დასავლეთ ბალკანეთის და აფრიკის ქვეყნებით დამთავრებული და საქართველოში.
2012 წელს, საქართველოში, ჩემ კოლეგასთან, სენატორ რიშთან ერთად ჩავედი, რათა ოფიციალურად დავკვირვებოდით არჩევნებს. ეს იყო არჩევნები მიხეილ სააკაშვილის პარტიას “ერთიან ნაციონალურ მოძრაობასა” და მოწინააღმდეგე “ქართულ ოცნებას” შორის, რომელიც მილიარდერი ოლიგარქის, ბიძინა ივანიშვილის მიერ მხარდაჭერილი და დაფუძნებული პარტია იყო. ეს ბრძოლა იყო არა მხოლოდ პარლამენტზე, არამედ მთავრობაზე კონტროლის მოსაპოვებლადაც.
სენატორი რიში და მე არჩევნების დღეს ვიმყოფებოდით რამდენიმე საარჩევნო უბანზე და საერთაშორისო დამკვირვებლების შეფასებას დავეთანხმეთ, რომ ეს იყო თავისუფალი და სამართლიანი არჩევნები და რომ არჩევნებში „ქართული ოცნება“ იყო გამარჯვებული. მაგრამ ქვეყანაში არსებობდა რეალური შეშფოთება იმასთან დაკავშირებით, რომ სააკაშვილი ძალაუფლების დათმობას არ გეგმავდა. ეს შესაძლოა ძალადობის მიზეზი გამხდარიყო. ეს კი დაასრულებდა ახლადფორმირებულ დემოკრატიულ რეფორმებს, რომელიც ამ ყოფილ საბჭოთა რესპუბლიკაში ტარდებოდა.
არჩევნების მეორე დღეს, სენატორი რიში და მე, შევხდით პრეზიდენტ სააკაშვილს. შეხვედრისას ვისაუბრეთ იმაზე, რომ დემოკრატიის მთავარი მიმანიშნებელი, რისთვისაც იგი პრეზიდენტობის 8 წლის განმავლობაში ბევრს მუშაობდა, იქნებოდა ხელისუფლების მშვიდობიანად გადაცემა მათთვის, ვინც ამომრჩეველმა აირჩია. პრეზიდენტმა სააკაშვილმა მოგვისმინა და მან მშვიდობიანად დატოვა ხელისუფლება.
მნიშვნელოვანია ყველა აცნობიერებდეს, რომ ამერიკა, როგორც დემოკრატიები ყველგან, დაფუძნებულია ძალაუფლების მშვიდობიან გადაცემაზე“, – განაცხადა ჯინ შაჰინმა.
