ქვეყანაში კოვიდინფიცირების ზრდის მაჩვენებლის შემცირების თაობაზე ისაუბრა, მთავრობის ადმინისტრაციაში გამართულ ბრიფინგზე, დაავადებათა კონტროლისა და საზოგადოებრივი ჯანმრთელობის ეროვნული ცენტრის დირექტორმა ამირან გამყრელიძემ, თუმცა ამავდროულად აღნიშნა, რომ მოსალოდნელია სიკვდილიანობის ზრდა, რადგანაც საავადმყოფოებში 400-მდე პაციენტი მძიმე მდგომარეობაშია:
“ქვეყანაში გამოჩნდა ინფიცირების მაჩვენებლის კლება. ეს გახლავთ შედეგი, პირველ რიგში, იმ შემზღუდველი ღონისძიებების, რომელიც დაწესდა ნოემბრის ბოლოს. ამ ეტაპზე, ბოლო ერთი კვირის განმავლობაში, შეიძლება ვთქვათ, რომ შეჩერდა ზრდის მაჩვენებელი ქვეყანაში და გვაქვს ოდნავ სემცირებაც. მაგრამ ეს დამშვიდების საშუალებას არ იძლევა იმიტომ, რომ გაფართოებული ტესტირების ფონზე, ამ კვირაში, დღევანდელთან შედარებით, ჩვენ შეიძლება კიდევ გვქონდეს ინფიცირების ზრდა, თუმცა, დიდი ალბათობით, ეს არ უნდა იყოს ისეთი მაჩვენებელი, რომელიც გადააჭარბებს წინა კვირის საშუალო მაჩვენებელს.
ყველა შემზღუდველი ღონისძიებების დაცვის შედეგად ჩვენ ეს ზამთარი შეიძლება გავიაროთ ნაკლები ინფიცირებით და შესაბამისად ასევე შევამციროთ სიკვდილიანობის მაჩვენებელი. ჩვენ მომავალი 2 კვირა, პირდაპირ გეუბნებით, გვექნება სიკვდილიანობის მაჩვენებლის ზრდა, რადგანაც საკმაოდ დიდი რაოდენობა ადამიანების არის კრიტიკულ მდგომარეობაში, 400-მდე, ხელოვნურ ვენტილაციაზე. ყველაფერი კეთდება მათ გადასარჩენად, მაგრამ როგორც ხედავთ სტატისტიკიდან, სამწუხაროდ, ჩვენ გვაქვს სიკვდილიანობის ზრდა, რაც მოსალოდნელი იყო“, – განაცხადა ამირან გამყრელიძემ.
