ქვეყანაში ჟანგბადით მომარაგების საკითხი სრულად გადაწყვეტილია – ნათია თურნავას

უწყებათაშორისი საკოორდინაციო საბჭოს სხდომის დასრულების შემდეგ გამართულ ბრიფინგზე, ეკონომიკისა და მდგრადი განვითარების მინისტრმა ქვეყანაში საავადმყოებისათვის ჟანგბადის მიწოდებასთან დაკავშირებულ საკითხებზე ისაუბრა. ნათია თურნავას განცხადებით, ეკონომიკის სამინისტრო ერთვება საქართველოში სამედიცინო ჟანგბადის წარმოების სიმძლავრეების დანერგვისა და მარაგების შექმნის ხელშეწყობაში. ასევე, მოსახლეობასა და ჯანდაცვის სექტორს არწმუნებს, რომ ამ კუთხით არანაირი პრობლემა არ შეიქმნება და ქვეყანაში ჟანგბადით მომარაგების საკითხი სრულად გადაწყვეტილია:

„დავინახეთ რა ამის საჭიროება, მთავრობასთან შეთანხმებით, ოპერატიულად შევიძინეთ თურქეთის ერთ-ერთ ქარხანაში ჟანგბადის დიდი სიმძლავრის 10 გენერატორი თავისი კომპრესორით. თითოეული დღეში 1 ტონა ჟანგბადს აწარმოებს. აქედან ორი დანადგარი უკვე ჩამოვიდა საქართველოში და დამონტაჟდა რუხის კლინიკაში, სადაც ეს პრობლემა პრაქტიკულად გადაჭრილია. 17 დეკემბერს ველოდებით, რომ კიდევ 6 დანადგარი შემოვა თურქეთიდან და უკვე წინასწარ ვიცით, რომ აქედან 3 დამონტაჟდება ბათუმის რესპუბლიკურ საავადმყოფოში და კიდევ სამი, ჯანდაცვის სამინისტროსთან შეთანხმებით, დამონტაჟდება თბილისის რესპუბლიკურ საავადმყოფოში, სადაც ეს პრობლემა იქნება ასევე გადაჭრილი. დარჩენილი დანადგარები, როდესაც ჩამოვა, ასევე ჯანდაცვის სამინისტროსთან შეთანხმებით, სხვადასხვა კლინიკებში გადანაწილდება. გარდა ამისა, ჩვენ ხელი შევუწყვეთ კერძო კლინიკებს, თავადაც შემოეტანათ ასეთი დანადგარები და გაეზარდათ სამედიცინო ჟანგბადის სიმძლავრეები“, – განაცხადა ნათია თურნავამ.

მინისტრის თქმით, დღეს არსებული სიმძლავრეები იზრდება, კერძოდ – პროგრამის „აწარმოე საქართველოში“ ფარგლებში სამინისტრო დაეხმარა ჟანგბადის რამდენიმე წარმოებას, რათა თავის პოტენციურ სიმძლავრეზე გასულიყო, ახალი დანადგარები დაემონტაჟებინა, ან მწყობრიდან გამოსული შეეკეთებინა, შედეგად კი სამედიცინო ჟანგბადის ადგილობრივი წარმოება მნიშვნელოვნად გაიზარდა.

ავტორი
ნინი შავლაძე