“მხოლოდ ეს თამაში კი არა, მთელი წარსული და მომავლის დიდი ნაწილი წავაგეთ” – გიორგი კეკელიძე

საქართველოს პარლამენტის ეროვნული ბიბლიოთეკის გენერალური დირექტორი, პოეტი, პროზაიკოსი, კინოსცენარისტი გიორგი კეკელიძე სოციალური ქსელით ეხმიანება საქართველო-მაკედონიას შორის გამართულ საფეხბურთო მატჩს, რომელიც ქართველი ნაკრების მარცხით დასრულდა და მწვავედ აკრიტიკებს, თუმცა აქვე განაწყენებულ გულშემატკივრებს კორექტულობისკენ და სწორი შეფასებებისკენ მოუწოდებს:

‘‘ის რომ წაგება და საქართველოს საფეხბურთო ნაკრები ძმები არიან, მით უფრო გადამწყვეტ წუთას ხდებიან ახლო ნათესავები – ახალი ამბავი ვერ არის. ნუ დავაბრალებთ მხოლოდ ფეხბურთელების ტრავმებს, ნურც ცარიელ სტადიონს.

ფეხბურთის ნაკრები, რომელსაც ევროპის ჩემპიონატზე თამაში სურს, ასეთ მეორე ტაიმს არ უნდა გვაჩვენებდეს. არ მიყვარს წაგებულზე ნიშნის მოგებით საუბარი, უბრალოდ ახლა, მხოლოდ ეს თამაში კი არა, მთელი წარსული და მომავლის დიდი ნაწილი წავაგეთ.

p.s. ძალიან გთხოვთ, ფეხბურთელების მიმართ არაკორექტული გამონათქვამებისგან თავი შევიკავოთ. სხვა სპორტში რომ გვიჭირს, ეს არ ნიშნავს, რომ ერთმანეთის ლანძღვა უნდა ვაქციოთ ეროვნულ სპორტად. მხოლოდ კრიტიკა და სწორი ანალიზი გვმართებს’’, – წერს გიორგი კეკელიძე ფეისბუქის პირად გვერდზე.

ავტორი
ანა რობაქიძე