EMC-ს ორგანიზებით, მთავრობის კანცელარიის წინ გაიმართა სამშვიდობო აქცია, ყარაბაღში ბოლო დროს მიმდინარე პროცესებთან დაკავშირებით. აქციაზე წაიკითხეს სამშვიდობო მანიფესტი, რომელსაც ხელს 20-მდე საზოგადოებრივი ორგანიზაცია და 400-მდე მოქალაქე აწერს. მანიფესტი სამშვიდობო ხასიათისაა და მთავარი მოწოდება, შეიარაღებული დაპირისპირების შეწყვეტაა.
ამ თემაზე საინფორმაციო სააგენტო „პარალელთან“ კომენტარი გააკეთა ადამიანის უფლების სწავლებისა და მონიტორინგის (EMC-ის) ერთ-ერთმა დამფუძნებელმა და დირექტორთა საბჭოს წევრმა თამთა მიქელაძემ:
- რამდენად მნიშვნელოვანია, ყარაბაღში განვითარებულ მოვლენებთან დაკავშირებით საქართველოს ჩართულობა?
„ჩვენ ვფიქრობთ, რომ საქართველოს აქვს მნიშვნელოვანი პოტენციალი, მეზობელ ქვეყნებს შორის არსებულ დაპირისპირებაში შეასრულოს „მშვიდობის“ როლი, მათ დიალოგს შეუწყოს ხელი. ჩვენ ვფიქრობთ, რომ ომი არის სერიოზული პრობლემა, რომელიც შეიწირავს მშვიდობიან მოქალაქეებს და ის ნამდვილად ახდენს ადამიანების დეჰუმანიზებას.
ომის პოლიტიკა ჩვენი რეგიონისთვის არის სრულიად მიუღებელი, ამიტომაც ვფიქრობ, რომ საქართველოს მთავრობამ სამშვიდობო პოლიტიკა, რეგიონში, კიდევ უფრო უკეთ უნდა გაიაზროს და გააძლიეროს, აქტიურად უნდა შეუწყოს ხელი დიალოგს, მეზობელ ქვეყნებს შორის.
გამოსავალი არის, ომის შეწყვეტა და პოლიტიკური მოლაპარაკებების დაწყება მიუხედავად იმისა, რომ ეს კონფლიქტი დიდი ხნის ისტორიას მოიცავს და დაძაბულობა მეზობელ ქვეყნებს შორის უკვე რამდენიმე ათეული წელია არსებობს.
ბუნებრივია, რომ ომის გზით, ამგვარი საკითების გადაწყვეტა ჩვენთვის მიუღებელია და როდესაც ჩვენ ამაზე ვსაუბრობთ, არ ვგულისხმობთ მხოლოდ ყარაბაღის კონტექსტს, არამედ, მათ შორის ქართულ კონტექსტსაც. დღეს მშვიდობის მესიჯს ვუგზავნით მოძმე აფხაზებს და ოსებს“, – განაცხადა თამთა მიქელაძემ.
ავტორი
ემილი ფეიქრიშვილი
