29 სექტემბერს, მარნეულში მომხდარი თავდასხმის დროს დაზარალებული, „მთავარი არხის“ ჟურნალისტ, ჯეიჰუნ მუჰამედალის დაკითხვა დასრულდა. კომენტარი აღნიშნულ საკითხთან დაკავშირებით გააკეთა, როგორც დაზარალებულმა, ასევე, მისმა ადვოკატმა.
დაზარალებული აცხადებს, რომ ძირითადად დაკითხვა მიმდინარეობდა ეთერში გასული კადრების მიხედვით, ჯერჯერობით, უცნობია ვინ არიან თავდამსხმელები და რამდენი ადამიანი იღებდა მონაწილეობას კონფლიქტში.
„გუშინ მომხდარ ამბებთან დაკავშირებით ჰქონდათ ძირითადად, ჩვეულებრივი სტანდარტული კითხვები: იცნობდით თუ არა მათ, ვინც თავს დაგესხათ? რამდენი პირი იყო? სად მოხდა? როგორ მოხდა? – რა თქმა უნდა, შესაბამის კითხვებს, შესაბამისი პასუხები გავეცი.
გამოძიებამ მხოლოდ ის კადრები გვაჩვენა, რაც ეთერში გავიდა. კადრებში ჩანს პირი, რომელიც ამ ინციდენტის მთავარი მაპროვოცირებელია, ის გვაყენებს შეურაცხყოფას და ხელით ეხება კამერას, ამას მოყვება ის ყველაფერი, რაც შემდეგ მოხდა.
გამოძიებას გადავეცი ჩემი ტანსაცმელი, ვაჩვენე პერანგი, რომელიც გახეული იყო, ექსპერტიზა ხვალ იქნება.
ამ თემასთან დაკავშირებით, მე და ჩემი ოპერატორი, ასევე სხვა იქ მყოფი ჟურნალისტები არიან დაკითხული“, – აღნიშნა ჯეიჰუნ მუჰამედალიმ.
ჟურნალისტებთან კომენტარს აკეთებს დაზარალებულის ადვოკატი, დიმიტრი საძაგლიშვილი. მისი აზრით, სამართალდამცავებს დამნაშავეების იდენტიფიცირება არ უნდა გაუჭირდეთ, თუმცა, არ აქვს იმედი, რომ გამოძიებას ეფექტური შედეგები მოყვება და დამნაშავეები დაისჯებიან:
„რამდენადაც ჩვენთვის ცნობილია გამოძიებას არ ჰყავს იდენტიფიცირებული ის პირები, რომლებმაც ფიზიკური შეურაცხყოფა მიაყენეს ჯეიჰუნს. ასევე ჩვენთვის უცნობია, თუ რა ქრონოლოგიით და როდის ჩაატარებენ საგამოძიებო მოქმედებებს, ვის დაკითხავენ, ან საერთოდ, რა შინაარსის საგამოძიებო მოქმედებებს ჩაატარებენ.
ვინაიდან თავდასხმა მოხდა ხალხმრავალ ადგილას, სადაც იმყოფებოდა უამრავი ადამიანი და არც თუ ისე შორს იმყოფებოდნენ პოლიციელები, ცხადია რომ ჩვენი შეფასებით ძალიან მარტივია იმ ადამიანების იდენტიფიცირება, ვინც ფიზიკური შეურაცხყოფა მიაყენა ჯეიჰუნს და, შესაბამისად, ეს საქმე არ არის რთულად გამოსაძიებელი, ვნახოთ, რა საგამოძიებო მოქმედებებს განახორციელებენ. სიმართლე გითხრათ, კიდევ ერთხელ მინდა ხაზი გავუსვა, რომ ჩვენ არ გვაქვს მოლოდინი, რომ ამ გამოძიებას ეფექტური შედეგი მოყვება.
ჩვენ როგორც გვითხრეს, იმ ადგილზე არ არის დამონტაჟებული გარე-სამეთვალყურეო კამერებიი და ამიტომ ჩანაწერები მათ მოპოვებული არ აქვთ. ასე გვითხრეს ყოველ შემთხვევაში, მეტი ჩვენთვის ცნობილი არაფერი არ არის. მე პირადად არ ვყოფილვარ შემთხვევის ადგილზე და ვერ გეტყვით რამდენად სარწმუნოა ეს ინფორმაცია“, – საკითხზე ვრცელ კომენტარს აკეთებს ადვოკატი, დიმიტრი საძაგლიშვილი.
