„სტრატეგია აღმაშენებელის“ ლიდერი გიორგი ვაშაძე ჭიათურის მაღაროში მომხდარი უბედური შემთხვევის შედეგად 46 წლის მემანქანის, კობა ჩაფიძის გარდაცვალების გამო მწუხარებას გამოთქვამს და დაღუპული ოჯახის წევრებსა და ახლობლებს უსამძიმრებს.
ოპოზიციონერი ლიდერი ჭიათურის მაღაროში არსებულ მძიმე მდგომარეობაზეც საუბრობს:
„მწუხარებას გამოვთქვამ ჭიათურაში მომხდარი მორიგი ტრაგედიის გამო, რომელსაც 46 წლის მამაკაცის სიცოცხლე ემსხვერპლა. ეს არის მორიგი შემთხვევა, რომელმაც დაგვანახა თუ როგორ ილახება ადამიანთა უფლებები და რომ მათ უსაფრთხო გარემოში არ უწევთ მუშაობა. ამ შემთხვევაში მთავარი შრომის უსაფრთხოების კანონი კი არ არის, რომელიც ისედაც მკაცრია ქვეყანაში, არამედ პრობლემა, მაღაროს მმართველ კომპანიაშია, რომელიც გარიგებულია “დამსხვრეული ოცნებების” მთავრობასთან. კომპანია, რომელიც ძარცვავს მთელ ჭიათურას და ერთადერთი ინტერესი გააჩნია, რაც შეიძლება ბევრი ფული გააკეთოს მარგანეცის მოპოვებაში, სანაცვლოდ კი, არ ზრუნავს შრომის უსაფრთხოებაზე და ერთი ლარის ინვესტიციასაც კი არ ახორციელებს,“ – აცხადებს გიორგი ვაშაძე და ხელისუფლებას ამ კომპანიასთან გარიგებაში ადანაშაულებს.
„სტრატეგია აღმაშენებელის“ ლიდერი აცხადებს, რომ ასობით მილიონი ლარი ილექება კონკრეტული ადამიანის ჯიბეებში და კაპიკები იხარჯება მომუშავე პერსონალზე ხელფასის სახით:
„ხელისუფლება არანაირ ყურადღებას არ აქცევს ჭიათურის მანგანუმში არსებულ იმ უმძიმეს მდგომარეობას, რომელშიც ხალხი მუშაობს. ასობით მილიონი ლარი ილექება კონკრეტული ადამიანის ჯიბეებში და კაპიკები იხარჯება მომუშავე პერსონალზე ხელფასის სახით. კატასტროფულ გარემოში უწევთ მუშაობა ჭიათურაში ადამიანებს. როგორც კი გავხდები ქვეყნის პრემიერ-მინისტრი, პირველ რიგში დავიცავთ თითოეული ჭიათურელის ინტერესს, ჭიათურ-მანგანუმის შემოსავლებიდან აუცილებლად წავა კონკრეტული თანხები ადგილობრივ ბიუჯეტში, ამას აუცილებლად გავაკეთებთ. აქ არსებული ფინანსური რესურსი ადგილობრივმა მოსახლეობამ უნდა მოიხმაროს. ამასთან, არცერთ კომპანიას არ ექნება უფლება დაარღვიოს კანონი და არ უზრუნველყოს შრომითი უსაფრთხოების სტანდარტები, რაც აუცილებელია. დიდი კორუფციული სქემა, რომლითაც ხელმძღვანელობენ ჭიათურის მანგანუმში ერთხელ და სამუდამოდ დაიშლება. შემოსავლები კი ქართველი ოჯახების ბიუჯეტს შეავსებს,“ – აცხადებს გიორგი ვაშაძე.
