ტყიბულისა და თერჯოლის მიტროპოლიტი, მეუფე გიორგი (შალამბერიძე) თერჯოლაში 11 წლის ბავშვის გარდაცვალების შესახებ „რუსთავი 2-თან“ კომენტარს აკეთებს და აღნიშნავს, რომ ეკლესია წესის აგებას ვერ შეძლებს, რადგან გარდაცვალების მიზეზად თვითმკვლელობა სახელდება. მეუფე გიორგიმ განაცხადა, რომ საქმის გამოძიებას მამაოს დაავალებს და საბოლოო გადაწყვეტილებას ამის საფუძველზე მიიღებს:
“ჩვენ ამას ვერ გავაკეთებთ, ეს ღვთის გმობაა, სად გვაქვს ამის უფლება? არ შეიძლება გამონაკლისები, ღმერთს გამონაკლისები არ აქვს, ღმერთი ზუსტად მოქმედებს.
11 წლის ბავშვი გაუაზრებელია? როგორ გეკადრებათ, ეს ჩვენს კანონში არ წერია..
გამონაკლისები ხდება იმ შემთხვევაში, თუ ექიმის ცნობები გვაქვს, ხოლო თუ არაფერი გვაქვს, ჩვენ ვერაფერს გავაკეთებთ.
დავავალებ მამაოს, გამოიკვლიოს და პასუხს შემდეგ მოგახსენებთ, ჯერ კი გამოვიძიებთ,“ – აცხადებს მეუფე გიორგი.
აღნიშნულთან დაკავშირებით კომენტარს გარდაცვლილი მოზარდის ბებიაც აკეთებს. ოჯახი საპატრიარქოს გამონაკლისის დაშვებას სთხოვს, რადგან ბავშვი მორწმუნე იყო. გარდა ამისა, ბებიის თქმით, უცნობია მან თავი ნამდვილად მოიკლა, თუ არა:
„ვთხოვთ საპატრიარქოს, დამეხმაროს ამაში და ჩემს პატარას აქედან წესის აუგებლად ნუ გაუშვებს. ის მორწმუნე იყო.
შეიძლება, სულ არ მოუკლავს თავი, არ ვიცი, ვერ ვიტყვი, ღმერთის წინაშე მართალი უნდა ვიყო. ხოლო თუ ბავშვმა თვითმკვლელობა ნამდვილად ჩაიდინა, ეს იყო სტრესის გამო, ამიტომ ვთხოვ საპატრიარქოს, რომ წესის აგების ნება დართოს.
მე მაქვს იმედი, რომ გამონაკლისს დაუშვებენ,“ – აცხადებს “რუსთავი 2”-თან გარდაცვლილი მოზარდის ბებია.
ავტორი
ეკა ქაჩლიშვილი
