„სტრატეგია აღმაშენებლის“ ახალგაზრდული ორგანიზაციის წარმომადგენლებმა მთავრობის ადმინისტრაციასთან აქცია-პერფომანსი გამართეს. ორგანიზაციის ხელმძღვანელმა, ლაშა დიაროვმა ისაუბრა ქვეყანაში არსებულ კრიმინოგენულ მდგომარეობაზე, კრიმინალის გაზრდაში კი „ქართული ოცნება“ დაადანაშაულა და იმედი გამოთქვა, რომ ოქტომბერში ხელისუფლება შეიცვლება და ქვეყანაში არსებული კრიმინოგენული მდგომარეობა გამოსწორდება:
“სამწუხაროდ, უკვე დღე აღარ გავა, რომ არ გავიგოთ რაიმე საზარელი დანაშაულის შესახებ. ეს იქნება მკვლელობები, გაუპატიურების ფაქტები თუ ასე შემდეგ.
“დამსხვრეული ოცნებების” პარტიის მმართველობის თითოეული დღე იქცა ახალი დანაშაულის წახალისებისა და ჩადენის დღედ.
სამწუხაროდ, ჩვენ უკვე ვნახეთ „IDF“-ის ოფიციალური მონაცემებიც, რომელთა მიხედვითაც ქართული ოცნების მმართველობის პირობებში, დღითიდღე ძალმომრეობითი დანაშაულებების რაოდენობა იზრდება, გამოძიებული დანაშაულებების რაოდენობა კი იკლებს.
41 ათასზე მეტი კრიმინალი დადის დღეს ქუჩაში და როგორ შეიძლება ამის შემდგომ, დღეს ჩვენ ვიგრძნოთ თავი დაცულებად და ფაქტია, რომ არც ვართ დაცულები. ზოგ ადამიანს მანქანაში პოულობენ, სამწუხაროდ, გარდაცვლილს, ზოგიერთს საკუთარ კოტეჯში, ზოგიერთს მტკვარში და ა.შ.
სამწუხაროდ, მთავრობა პოლიციასა და სამართალდამცავ სტრუქტურებს იყენებს არასწორად, პოლიტიკური მიზნებისთვის. პოლიციელები დაგვდევენ ჩვენ – ახალგაზრდა აქტივისტებს, ოპოზიციის წევრებს, უთვალთვალებენ, აშანტაჟებენ და იჭერენ მათ. რეალურად კი იმ საქმეს, რაც მათ უნდა გააკეთონ, აღარ აკეთებენ.
ოქტომბერში ხელისუფლება უნდა შეიცვალოს და მოვიდეს პასუხისმგებლობის გრძნობის მქონე ხელისუფალი, რომელიც სამართალდამცავი ორგანოების დეპოლიტიზირებას მოახდენს და მას რეალურ ფუნქციას დაუბრუნებს. ამის შემდგომ, დარწმუნებული ვარ, რომ კრიმინალის დონეც დაიწევს ქვეყანაში და დანაშაულებიც გამოძიებული იქნება”, – აცხადებს ლაშა დიაროვი.
ავტორი
ეკა ქაჩლიშვილი
