უწყებათაშორისმა საკოორდინაციო საბჭომ მიიღო გადაწყვეტილება, რომ სოფელ ლენჯერში დაწესებული რეგულაციები 21 აგვისტოდან გაუქმდეს გარდა დაბა მესტიისა და სოფელი ლენჯერისა. საბჭომ ასევე შემოიღო რეგულაცია, რომ ზღვისპირა კურორტებზე, კაფე-ბარებისა და კლუბების პერსონალს ჩაუტარდეთ ინტენსიური ტესტირება კორონავირუსზე.
“მესტიის მუნიციპალიტეტის ყველა სოფელსა და დასახლებაში, გარდა დაბა მესტიისა და სოფელი ლენჯერისა, 21 აგვისტოდან საკარანტინო შეზღუდვები მოიხსნება, – აღნიშნული გადაწყვეტილება პრემიერ-მინისტრის ხელმძღვანელობით მოქმედმა უწყებათაშორისმა საკოორდინაციო საბჭომ დღევანდელ სხდომაზე მიიღო.
სხდომაზე აღინიშნა, რომ მესტიის მუნიციპალიტეტში შეზღუდვების დაწესებიდან დღემდე, ეფექტიანი და დროული ღონისძიებები განხორციელდა, მათ შორის ჩატარდა მოსახლეობის ინტენსიური ტესტირება, რის შედეგადაც შეიძლება ითქვას, რომ ადგილზე ეპიდემიოლოგიური ვითარება კონტროლს ექვემდებარება.
“მიმდინარე კვლევების გათვალისწინებით, საკარანტინო შეზღუდვები დროებით ნარჩუნდება დაბა მესტიასა და ლენჯერში, თუმცა ეს საკითხი ეპიდემიოლოგიური ვითარების შესაბამისად გადაიხედება. საკოორდინაციო საბჭოს დღევანდელ სხდომაზე, ასევე განიხილეს საქართველოს კურორტებზე, განსაკუთრებით კი შავი ზღვის სანაპიროზე არსებული ვითარება.
დამსვენებელთა საკმაოდ დიდი კონცენტრაციის გათვალისწინებით, მიღებულია პრევენციული ღონისძიებების გატარების გადაწყვეტილება, კერძოდ, ვირუსის გავრცელების თავიდან აცილების მიზნით, ფართოვდება მიზნობრივ ტესტირებას დაქვემდებარებულ პირთა წრე. ტესტირება ჩაუტარდება ისეთი ობიექტების პერსონალს, სადაც განსაკუთრებით დიდია მობილობა, მაგალითად, კაფე-რესტორნებისა და კლუბების თანამშრომლებს,”- ნათქვამია საქართველოს მთავრობის მიერ გავრცელებულ განცხადებაში.
ავტორი
მახო ზავრაშვილი
