„სტრატეგია აღმაშენებლის“ ლიდერმა, გიორგი ვაშაძემ და მისი გუნდის წევრებმა აფხაზეთში ომის დაწყების 28-ე წლისთავთან დაკავშირებით, გმირთა მემორიალი მოინახულეს და გვირგვინით შეამკეს.
პოლიტიკური პლატფორმის ლიდერებმა აქცენტი საქართველოს ტერიტორიული მთლიანობის აღდგენის სტრატეგიაზე გააკეთეს:
“პირველ რიგში, დიდება გმირებს, ადამიანებს ვინც საქართველოს ღირსება დაიცვეს!
საქართველოს ტერიტორიული მთლიანობა, რომელიც უპირობოდ იქნება აღდგენილი, აღმშენებლობაზე გადის. ამიტომ ქვეყანაში აღმშენებლობის პროცესი უნდა დავიწყოთ იმისათვის, რომ ტერიტორიები დავიბრუნოთ, საქართველო გავაერთიანოთ, დევნილები საკუთარ საცხოვრებელში დავაბრუნოთ.
დევნილებსა და ვეტერანებს, რომლებიც სამშობლოსთვის იბრძოდნენ, ფაქტობრივად, ყურადღება აქ ექცევათ. ამ გმირების ოჯახები მიტოვებულები არიან, რაც, რა თქმა უნდა, უზარმაზარ პრობლემებს ქმნის ქვეყანაში პატრიოტული მუხტის გაღვივებასთან დაკავშირებით.
კიდევ ერთხელ ვამბობ, აღმშენებლობა, აღმშენებლობა და აღმშენებლობა, რომელიც მთლიან, ძლიერ, ყველა მოქალაქისათვის ღირსეულ საქართველოს მოგვიტანს!“, – განაცხადა გიორგი ვაშაძემ.
„ამ გმირების დიდებით და მათი ხსოვნის არდავიწყებით შევძლებთ, რომ აფხაზეთში დავბრუნდეთ, დავიბრუნოთ ის ხალხი, რომელიც დღეს ოკუპირებულ ტერიტორიებზე ცხოვრობს.
ყველაფერი უნდა გავაკეთოთ იმისათვის, რომ აფხაზებთან შერიგების პროცესი დაიწყოს და საქართველო გამთლიანდეს, მოხდეს ინტეგრაცია,“ – აღნიშნა თეონა აქუბარდიამ.
„ჩვენთვის მნიშვნელოვანია იმ ოჯახების ხსოვნა და დაფასება, ვინც საქართველოს მთლიანობისთვის ბრძოლას შეეწირა. ეს არის „სტრატეგია აღმაშენებლის“ პრიორიტეტი. ჩვენ ამ ხაზს ვაგრძელებთ და ასე იქნება მაშინაც, როცა ხელისუფლებაში მოვალთ,“ – აცხადებს პაატა მანჯგალაძე.
ავტორი
ეკა ქაჩლიშვილი
