„სტრატეგია აღმაშენებლის“ ლიდერი გიორგი ვაშაძე საქართველოში ეკონომიკურ კრიზისზე საუბრობს და მთავრობას რეკომენდაციებს აძლევს. მმართველი გუნდის ოპონენტი მოუწოდებს გიორგი გახარიას, რომ შეეშვას ზედაპირულ განცხადებებსა და ცრუ დაპირებებს და ამის ნაცვლად, ბიზნესის დასახმარებლად რეალური ქმედითი ნაბიჯები გადადგას:
„სამწუხაროდ, „დამსხვრეული ოცნებების“ პარტიის პრემიერ-მინისტრი და მთავრობა, კვლავ ნახევარნაბიჯებით და ცრუ საქმითაა დაკავებული.
საქართველოსთვის გამოყოფილია 5 მილიარდი, საიდანაც ქართულ ბიზნესს არაფერი არ მიუღია, გარდა ფუქსავატური, ზედაპირული განცხადებებისა. მაგალითად, გუშინ გახარიამ გვითხრა, რომ გადაავადებს მანქანების განბაჟების ვადას. რა თქმა უნდა, ჩვენ ამას ვითხოვდით და ეს აქამდეც უნდა გაკეთებულიყო, მაგრამ ეს საკმარისი არ არის.
საქართველოში მთავარ პრობლემას წარმოადგენს სასესხო ვალდებულებები, რომლებიც აქვთ მანქანების რეექსპორტში ჩართულ პირებს, ტურისტულ სექტორს და ამ მიმართულებით „დამსხვრეული ოცნებების“ პარტია არაფერს არ აკეთებს.
მივმართავ პირადად გახარიას, თქვენ მართლა გგონიათ, რომ ამ ქვეყანაში ბნელა?! – 45 მილიონი ლარი აჩუქეთ თქვენთან დაკავშირებულ კომპანიებს, ამაზე საუბრობს „საერთაშორისო გამჭირვალობა“, „IDFI“, „BELLINGCAT“, ხალხს კი კაპიკები გადაუგდეთ.
მხოლოდ და მხოლოდ საბაჟო გადასახადის გადავადება ეყოფა იმ სექტორს, რომელიც საქართველოში 10 000-ბით ოჯახს არჩენდა? ტურისტული სექტორი მიაგდეთ და აღარაფერს აკეთებთ. თქვენ გგონიათ, ჩამონგრეული სასტუმროს ინფრასტრუქტურის აშენება, ასეთი მარტივი იქნება?
კიდევ ერთხელ მოგიწოდებთ, ნუ ხართ დაკავებული ცრუ საქმით და ზედაპირული განცხადებებით!
გაიაზრეთ, რომ ქვეყანა უმძიმესი პრობლემის წინაშე დგას! შეეშვით ფულის კეთებას! პირდაპირ გეუბნებით, პირადად თქვენ, გაიაზრეთ და გაითვალისწინეთ ის რეკომენდაციები, რომლებსაც ჩვენ გაძლევთ!
სესხზე პროცენტი აუცილებლად უნდა ჩამოიწეროს მთელი კრიზისის პერიოდში. საბანკო სექტორს ამის რესურსი აქვს. 130 მილიონი მოგება მხოლოდ ივნისში აჩვენეს მაშინ, როცა ყველა უმძიმეს ვითარებაში ვიმყოფებით.
მანქანების რეექსპორტთან დაკავშირებით, დაუყოვნებლივ უნდა გაკეთდეს სპეც-პროექტი, რაც გულისხმობს იმას, რომ გადავადებასთან ერთად, ეს 1 მაისის შემდგომ შემოყვანილ მანქანებზეც უნდა გავრცელდეს. მათ, ვინც მანქანების ყიდვის მიზნით, სპეციალური პროცედურის გავლით შემოდის საქართველოში, უნდა მიეცეთ შესაძლებლობა, წინასწარი ტესტირებით ჩამოვიდნენ და მოხერხდეს იმ მანქანების გაყიდვა, რომლებიც საქართველოშია.
ტურისტულ სექტორში სრული სუბსიდირება უნდა მოხდეს იმ საპროცენტო ნაწილისა, რომლებსაც მათ ბანკები ახდევინებენ. ეს არის აუცილებელი, რათა ქვეყანა უმძიმესი კრიზისიდან გამოვიდეს.
კიდევ ერთხელ, მივმართავ გახარიას, ნუ ხართ დაკავებული მხოლოდ ტელევიზიაში პრანჭვით და ცრუ საქმით! უმძიმეს ვითარებაშია ქართული ეკონომიკა. ახლა მაინც, ამ ურთულეს პერიოდში, შეეშვით ფულის კეთებას და ქართული ბიზნესის დასახმარებლად რეალური ნაბიჯები გადადგით,“ – აცხადებს გიორგი ვაშაძე.
ავტორი
ეკა ქაჩლიშვილი
