გიორგი ვაშაძე გურამ ხარაზანაშვილის კლინიკა „MMT“-ს ეწვია. “სტრატეგია აღმაშენებლის” ლიდერი მკურნალობის უახლეს მეთოდებს გაეცნო და ამომრჩეველს დაპირდა, რომ არჩევნებში გამარჯვების შემთხვევაში, ონკოლოგიური დიაგნოსტიკა სახელმწიფოს მიერ სრულად დაფინანსდება:
„დღეს ჩვენი მთავარი მიზანია ონკოლოგიური დაავადებების მკურნალობა და საქართველოში უახლესი ტექნოლოგიების დანერგვა.
ჩვენმა გუნდმა ჩამოაყალიბა ონკოლოგიის მართვის სტრატეგია. როგორც კი ჩვენ არჩევნებით ხელისუფლებას შევცვლით, ონკოლოგია სრულად დაფინანსდება, პრევენციული გამოკვლევებიდან დაწყებული, უმაღლესი სტანდარტის დიაგნოსტიკით გაგრძელებული, მკურნალობითა და რეაბილიტაციით დამთავრებული.
წამლები აუცილებლად, 30%-ით უნდა გაიაფდეს. ამ მხრივ, გვსურს, დავნეგროთ ევროპული სტანდარტი, რადგან საშუალოდ წამლებიდან მოგება 102%-ს წარმოადგენს, როცა ნორმალურ ქვეყნებში ეს მაჩვენებელი,საშუალოდ, არის 20%.
თანხა, რომელიც გამოთავისუფლდება, შეიძლება, მოხმარდეს იმას, რაც ხალხს სჭირდება, რომ საჭირო პრეპარატების შესაძენად, პენსიონერებს სესხის აღება აღარ უწევდეთ. გპირდებით, ამას აუცილებლად გავაკეთებთ.
მიზანი უნდა იყოს: სიახლეები, ახალი ტექნოლოგიების შემოტანა, ხელმისაწვდომობა. ამაზე ჯანდაცვის სისტემა უნდა იყოს კონცენტრირებული.
ბატონ გურამ ხარაზანაშვილმა ეს ყველაფერი შეძლო და ყავს ახალგაზრდების გუნდი, რაც ყველაზე მეტად მომწონს. ასეთი რამ სახელმწიფოსთვის უნდა იყოს პრიორიტეტული.
წარმოიდგინეთ, ეს მომსახურება საქართველოშია. ეს არ არის არც გერმანია, არც – თურქეთი, არც – ამერიკა, სადაც პაციენტებს ხშირად უწევთ წასვლა. ეს არის უახლესი ტექნოლოგიები, რომლებსაც ანალოგი არ აქვს რეგიონში, მაგრამ ხალხისთვის ეს არ არის ხელმისაწვდომი.
ჩვენ პირობას ვდებთ, რომ ხელს შევუწყობთ ახალი ტექნოლოგიების დანერგვას და ეს სრულად დაფინანსდება.
ჩვენი სტრატეგია შედგება 4 კომპონენტისგან:
- პრევენცია
- ადრეული დიაგნოსტიკა
- მკურნალობა
- რეაბილიტაცია
ისეთ ადამიანს, როგორიც არის გურამ ხარაზანაშვილი, უნდა ჰქონდეს დიდი მხარდაჭერა, მით უმეტეს, მას ჰყავს ასეთი ახალგაზრდული გუნდი,” – განაცხადა გიორგი ვაშაძემ.
გურამ ხარაზანაშვილმა მადლობა გადაუხადა “სტრატეგია აღმაშენებლის” გუნდს აღნიშნული საკითხით დაინტერესების გამო, რადგან ონკოლოგიური დაავადებების დიაგნოსტიკა სახელმწიფოსთვის პრიორიტეტული, საზოგადოებისთვის კი ხელმისაწვდომი უნდა იყოს:
„ჩვენ მადლობელი ვართ, რომ „სტრატეგია აღმაშენებლის“ ფარგლებში ონკოლოგიუერი დაავადებები ხშირად იყო განხილვის თემა. მიგვაჩნია, რომ ონკოლოგია არის მიმართულება რომელიც სახელმწიფოსთვის პრიორიტეტული უნდა იყოს, რადგან დიდ თანხებთანაა დაკავშირებული. რა თქმა უნდა, გაგვიხარდება მთავრობის მხრიდან ხელშეწყობა ახალი ტექნოლოგიების შეძერნასა და დანერგვაში,“ – თქვა გურამ ხარაზანაშვილმა.
