ამერიკელი დიპლომატი, კელი დეგნანი ქუთაისის აეროპორტს ესტუმრა და განაცხადა, რომ ამერიკის შეერთებული შტატები ქუთაისის საერთაშორისო აეროპორტის გაფართოების საქმეში საქართველოს მხარდაჭერას უცხადებს, რადგან ეს საქართველოსთვის ძალიან მნიშვნელოვანია.
აღსანიშნავია, რომ ქუთაისის საერთაშორისო აეროპორტის ახალი სამგზავრო ტერმინალის სარემონტო სამუშაოები აქტიურად მიმდინარეობს, მათი დასრულების შემდეგ კი იგივე პროცესი იგეგმება არსებულ ტერმინალში, რის შემდეგაც ახალი და ძველი ტერმინალების შეერთების ფაზა დაიწყება. შედეგად, ქუთაისს ექნება განახლებული, თანამედროვე ტიპის და საერთაშორისო სტანდარტების შესაბამისი აეროპორტი – ერთი საერთო ტერმინალით, მოფრენისა და გაფრენის დარბაზებით.
როგორც ამერიკის ელჩმა აღნიშნა, მნიშვნელოვანია, რომ ახალი ინფრასტრუქტურის მოწყობისა და მშენებლობის დასრულების შემდეგ განახლებული აეროპორტი საათში 1200 მგზავრის შეუფერხებლად გატარებას შეძლებს, რაც მის გამტარუნარიანობას ოთხჯერ გაზრდის. კელი დეგნანის განცხადებით, ასევე მნიშვნელოვანია, რომ ქუთაისის აეროპორტი ევროპაში ყველაზე უსაფრთხო აეროპორტიც იქნება, ვინაიდან აქ სრულადაა დანერგილი Covid-19-თან დაკავშირებული ყველა რეგულაცია.
“დიზაინი არაჩვეულებრივია და აეროპორტი ულამაზესი იქნება. ეს პროექტი მნიშვნელოვანი საქართველოსთვის და შეერთებული შტატები მას მხარს დაუჭერს, რათა აეროპორტში გაიზარდოს იმ მაღალანაზღაურებად დასაქმებულთა რიცხვი, რომლებიც აეროპორტის უმაღლეს დონეზე ფუნქციონირებისთვის აუცილებელია.
ქუთაისის აეროპორტი არამარტო ერთ-ერთი ულამაზესი, არამედ ევროპაში ყველაზე უსაფრთხო აეროპორტიც იქნება, ვინაიდან აქ სრულადაა დანერგილი Covid-19-თან დაკავშირებული ყველა რეგულაცია და მოთხოვნა. ეს იქნება მართლაც თვალსაჩინო აეროპორტი, რომლის გახსნასაც მოუთმენლად ველით,“ – განაცხადა კელი დეგნანმა.
ავტორი
ეკა ქაჩლიშვილი
