„ახალი საქართველო“, „კანონი და სამართალი“ და „სტრატეგია აღმაშენებელი“ პოლიტიკურ პლატფორმას ქმნიან. ახალი პოლიტიკური ძალის პრეზენტაცია დღეს, გიორგი ვაშაძემ და თაკო ჩარკვიანმა გამართეს და სამომავლო გეგმებზე ისაუბრეს. პოლიტიკური ბლოკის ძირითადი მიზანი „დამსხვრეული ოცნებების“ პარტიის, უმუშევრობისა და სიღარიბის დამარცხება, ქვეყანაში ემიგრანტების დაბრუნება და ქვეყნის განვითარებაა:
„დღეს საქართველო იმყოფება უმძიმეს ვითარებაში. მილიონობით ადამიანი, ყოველდღიურად, ებრძვის სიღარიბესა და შიმშილს. ასობით ათასი ადამიანი არის უმუშევარი, ასობით ათასი ჩვენი თანამემამულე სამუშაოს საძიებლად საქართველოს საზღვრებს გარეთ გადის. ახალგაზრდები საქართველოში საკუთარ მომავალს ვერ ხედავენ. პენსიონერები, რომლებიც ისედაც ცოტა პენსიას იღებენ, უსამართლოდ მაღალ პროცენტს იხდიან ძვირი წამლების შესაძენად აღებული სესხისთვის.
ყველაფერ ამაში დამნაშავეა ერთი ძალა – „დამსხვრეული ოცნებების“ პარტია.
დიახ, „დამსხვრეული ოცნებების“ 8 წლიანი მმართველობის შედეგად, საქართველო არის უმძიმეს ვითარებაში.
მე მინდა საქართველოს თითოეულ მოქალაქეს კითხვა დავუსვა: ვცხოვრობთ ჩვენ იმაზე უკეთესად, ვიდრე 8 წლის წინ ვცხოვრობდით? შეასრულა რომელიმე პირობა მაინც „დამსხვრეული ოცნებების“ პარტიამ? რა გააკეთეს ხელისუფლებაში ყოფნის პერიოდში?
უფრო გავღარიბდით! უფრო გვშია! კერძო სექტორში სამუშაო ადგილების რაოდენობა, მხოლოდ ბოლო 4 წლის განმავლობაში, 45000-ით შემცირდა.
დღეს არის გადამწყვეტი მომენტი იმისათვის, რომ 31 ოქტომბერს საქართველომ გაიმარჯვოს, რომ საქართველოს მოქალაქეებმა გაიმარჯვონ. ეს განცხადება, რასაც ჩვენ ვაკეთებთ, სწორედ ამ გამარჯვებისკენ გადადგმული ნაბიჯია.
დიახ, ჩვენ მივიღეთ ახალი პოლიტიკური პლატფორმის, „სტრატეგია აღმაშენებლის“ შექმნის გადაწყვეტილება, რომელშიც შედის: “ახალი საქართველო”, “კანონი და სამართალი” და “სტრატეგია აღმაშენებლის” ის ექსპერტები, რომლებთან ერთადაც საზოგადოებას ქვეყნის განვითარების გეგმა წარვუდგინეთ.
ჩვენი მიზანია: დავამარცხოთ უმუშევრობა, დავამარცხოთ სიღარიბე, გავუმართოთ ხელი პენსიონერებს, დავაბრუნოთ ემიგრანტები საქართველოში.
არჩევანი ძალიან მარტივია – აღმშენებლობა ან „დამსხვრეული ოცნებების“ პარტია. ეს არის უმარტივესი არჩევანი რომელიც, თითოეულმა ჩვენგანმა უნდა გააკეთოს.
რაც შეეხება ლოგოს, თეთრი ფერი – ეს არის სისუფთავის, სიწმინდის, პატიოსნების სიმბოლო. წითელი ფერი – ბრძოლისა და გამარჯვების სიმბოლო და ქართული ეროვნული ფერი, რომლითაც ჩვენ უნდა ვიყოთ ამაყები და რომლითაც ყველამ უნდა ვიბრძოლოთ. ჯვარი – ეს არის ისტორიულად საქართველოსა და ქრისტიანული საზოგადოების სიმბოლო.
სტრატეგია არის ის, რაც დღეს საქართველოს განვითარებისთვის სჭირდება. აღმშენებლობა კი არის ის იდეა, რომელიც დაამარცხებს „დამსხვრეული ოცნებების“ პარტიას, რომელმაც სამწუხაროდ, მომავალი წაგვართვა,“ – განაცხადა გიორგი ვაშაძემ.
ავტორი
ეკა ქაჩლიშვილი
