საქართველოს პრემიერ-მინისტრმა, გიორგი გახარიამ საქართველოსა და ამერიკის სტრატეგიულ ურთიერთობაზე ისაუბრა და აღნიშნა, რომ მათ, ვინც ამ ურთიერთობის პოლიტიზირებას ახდენენ, არაფერი გამოუვათ, რადგან ჩვენს ქვეყანასა და ამერიკას შორის კავშირი პოლიტიკურ და პარტიულ ინტერესებზე მაღლა დგას.
„ჩემი მოსაზრებები ამასთან მიმართებაში არის ძალიან მარტივი. ამერიკის შეერთებულ შტატებს, საქართველოს სტრატეგიულ პარტნიორსა და ჩვენს ქვეყანას შორის თანამშრომლობა ღრმავდება.
თანამშრომლობის ისეთ სფეროებზეა საუბარი, როგორებიცაა – თავდაცვა, უსაფრთხოება, დემოკრატიზაცია, განათლება, ვაჭრობა, ეკონომიკა.
რა თქმა უნდა, ცალკეულ ჩვენს მეგობარს ამერიკის შეერთებული შტატებიდან, იქნება ეს კონგრესმენი თუ სენატორი, შეიძლება გარკვეული კითხვის ნიშნები ჰქონდეს და რა თქმა უნდა, მათ აქვთ ამ კითხვების დასმის უფლება ისევე, როგორც ჩვენ გვაქვს პასუხის გაცემის უფლება. ხედავთ, რომ ეს კითხვები დროთა განმავლობაში იხსნება.
ცუდია ის, რომ პოლიტიკური პროცესიდან გამომდინარე, ქვეყნის ინტერესების გათვალისწინების გარეშე, ვიღაც-ვიღაცები ცდილობენ, რომ ეს სტრატეგიული პარტნიორობა პოლიტიკური პროცესების ნაწილი გახადონ, რასაც ვერ მიაღწევენ, რადგან სტრატეგიული პარტნიორობა საქართველოსა და ამერიკის შეერთებულ შტატებს შორის ყველა სახის პოლიტიკურ თუ პარტიულ ინტერესზე მაღლა დგას. ეს ყველას კარგად ესმის, თუმცა დარწმუნებული ვარ, ასეთი მცდელობები გაგრძელდება, მაგრამ ამას შესაბამისი და საკადრისი პასუხი ექნება როგორც საქართველოს, ასევე ამერიკის შეერთებული შტატების მხრიდან,“ – განაცხადა მთავრობის მეთაურმა.
ავტორი
ეკა ქაჩლიშვილი
