საქართველოს პრემიერ-მინისტრმა გიორგი გახარიამ, საქართველოში საფრანგეთის ელჩს – დიეგო კოლასს ეროვნული დღესასწაული მიულოცა. შეხვედრისას, ხაზი გაესვა საქართველოსა და საფრანგეთს შორის ორმხრივ თანამშრომლობას და ასევე ქვეყნებს შორის პირდაპირი ავიამიმოსვლის ხელშეწყობა დაანონსდა, რაც საქართველოში საფრანგეთის ავიაკომპანია „AirFrance“-ს ფრენების აღდგენას გულისხმობს:
,,გიორგი გახარიამ საფრანგეთის საგანგებო და სრულუფლებიან ელჩს საქართველოში, დიეგო კოლასს ეროვნული დღესასწაული მიულოცა.
მთავრობის ადმინისტრაციაში გამართულ შეხვედრაზე ხაზი გაესვა ორმხრივი თანამშრომლობის დადებით დინამიკას და აღინიშნა, რომ საფრანგეთი და საქართველო ერთმანეთისთვის სანდო და საიმედო პარტნიორებს წარმოადგენენ.
როგორც საფრანგეთის ელჩმა აღნიშნა, საფრანგეთი უმაღლეს შეფასებას აძლევს საქართველოს ხელისუფლების და ზოგადად, საჯარო სექტორის მოქმედებებს პანდემიის პირობებში, რამაც ნათლად აჩვენა, რომ საქართველო არის ერთ-ერთი წარმატებული ქვეყანა COVID-19-თან ბრძოლაში.
ფრანგმა დიპლომატმა აღნიშნა, რომ ორმხრივი თანამშრომლობა კვლავაც გრძელდება, რისი დადასტურებაც არის, მათ შორის, ფინანსური დახმარება, 190 მილიონი ევროს ოდენობით, რომელიც საფრანგეთის განვითარების ფონდმა საქართველოსთვის გამოყო.
პრემიერმა და საფრანგეთის ელჩმა ხაზგასმით აღნიშნეს ევროკავშირის მიერ საქართველოს უსაფრთხო ქვეყნების სიაში შეყვანის მნიშვნელობა. გიორგი გახარიამ და დიეგო კოლასმა ისაუბრეს ასევე ქვეყნებს შორის პირდაპირი ავიამიმოსვლის ხელშეწყობაზე, რაც საქართველოში საფრანგეთის ავიაკომპანია „AirFrance“-ს ფრენების აღდგენას გულისხმობს,“ – ნათქვამია საქართველოს მთავრობის განცხადებაში.
ავტორი
ქეთა გაბრიაძე
