ანა ონიანის, კოვიდ-19-ით ინფიცირებული აბიტურიენტის, საგამოცდო პროცესში კვლავ ჩართვისაკენ მოუწოდებს განათლების მინისტრს მიხეილ ჩხენკელსა და განათლების ეროვნული ცენტრის ხელმძღვანელს სოფიო გორგოძეს „ახალი საქართველოს“ განათლების მიმართულების ხელმძღვანელი, ნანა ტოხვაძე და აცხადებს, რომ ანას ახლა სჭირდება მხარდაჭერა და სწორედ ამისთვის არსებობს სახელმწიფო, რომ ნიჭიერ, ოქროს მედალოსან ახალგაზრდებს აღმოუჩინოს დახმარება საჭირო და გადამწყვეტ დროს:
„სოციალური ქსელის მეშვეობით თუ სატელევიზიო სიუჟეტებიდან საზოგადოება უკვე კარგად იცნობს ანა ონიანს, აბიტურიენტს, რომელიც 7 ივლისს ეროვნულ გამოცდებზე გავიდა და მას კორონავირუსი დაუდასტურდა. ანას ჩვენი მხარდაჭერა სჭირდება და ამისთვის არსებობს სახელმწიფო, რომ ნიჭიერ, ოქროს მედალოსან ახალგაზრდებს აღმოუჩინოს დახმარება საჭირო და გადამწყვეტ დროს.
ოჯახის წევრებთან კომუნიკაციის შედეგად გავარკვიეთ, რომ საბედნიეროდ, ანა ონიანის ჯანმრთელობის მდგომარეობა იძლევა საშუალებას გააგრძელოს საგამოცდო მარათონი. მივმართავ განათლების მინისტრს, მიხეილ ჩხენკელს და გამოცდებისა და შეფასების ეროვნული ცენტრის ხელმძღვანელს, სოფიო გორგოძეს – დაუყოვნებლივ უზრუნველყონ ანა ონიანის საგამოცდო პროცესში ჩართულობა, თუნდაც კლინიკიდან ან იხელმძღვანელონ იმავე საგამონაკლისო წესით, როგორც ობიექტური მიზეზების გათვალისწინებით მინისტრის ბრძანების საფუძველზე, ვრიცხავთ უმაღლეს სასწავლებლებში ოკუპირებული ტერიტორიებიდან რეგისტრირებულ აბიტურიენტებს,“ – განაცხადა ნანა ტოხვაძემ.
ავტორი
თამთა ასლანიშვილი
