დაავადებათა კონტროლის ეროვნული ცენტრის ხელმძღვანელი, ამირან გამყრელიძე განათლების სამინისტროს მიერ გამართულ საგანგებო ბრიფინგზე განმარტავს, რომ იმ აბიტურიენტის ჯანმრთელობის მდგომარეობა, რომელსაც ვირუსი დაუდგინდა, დამაკმაყოფილებელია. რაც შეეხება მასთან მყოფ დამკვირვებელსა და 9 აბიტურიენტს, მათ ჯერ-ჯერობით კვლევები უტარდებათ:
„გუშინწინ საქართველოს ერთ-ერთ რეგიონში ახალგაზრდა ქალბატონს კორონავირუსული ინფექცია დაუდასტურდა და როდესაც ჩვენ ვიკვლევდით მასთან კონტაქტირებულ ადამიანებს, კორონავირუსული ინფექცია დაუდასტურდა ერთ ახალგაზრდა გოგონას, რომელიც 7 რიცხვში გასულია ერთიან ეროვნულ გამოცდებზე.
ამასთან დაკავშირებით, გუშინ ღამით ჩვენ გვქონდა საგანგებო კომუნიკაცია განათლებისა და მეცნიერების სამინისტროსთან და საგამოცდო ცენტრთან. ყველა ღონისძიებაა გატარებული იმისათვის, რომ მოვახდინოთ ინფექციის გავრცელების პრევენცია და ასევე იმ აბიტურიენტებს, რომლებიც დაინფიცირებულთან ერთად წერდნენ გამოცდას, მივცეთ საშუალება, რომ შესაბამისი ეპიდემიოლოგიური წესების დაცვით გააგრძელონ გამოცდებზე გასვლა.
ინფიცირებული პაციენტის მდგომარეობა დამაკმაყოფილებელია, მას განსაკუთრებულად არაფერი არ აწუხებს. მოგეხსენებათ, რომ ახალგაზრდებს ეს ინფექცია ნაკლებად ერჩის. ის შემდგომი მკურნალობისთვის სამედიცინო დაწესებულებაშია გადაყვანილი. რაც შეეხება დანარჩენ 9 აბიტურიენტსა და დამკვირვებლებს, მათ შესაბამისი ეპიდსაწინააღმდეგო გამოკვლევები უტარდებათ,“ – აცხადებს ამირან გამყრელიძე.
გადამდებ დაავადებათა დეპარტამენტის ხელმძღვანელი, ხათუნა ზახაშვილი განმარტავს, რომ აბიტურიენტების დაინფიცირების შანსები მინიმალურია, რადგან უსაფრთხოების ზომები მაქსიმალურადაა დაცული.
განათლების მინისტრის მოადგილის, ნუნუ მიცკევიჩის განცხადებით, ინფიცირებული გამოცდების ჩაბარებას მომავალ წლამდე ვეღარ შეძლებს, რადგან მკურნალობის პროცესს გადის.
ავტორი
ეკა ქაჩლიშვილი
