საქართველოს პარლამენტის თავმჯდომარის მოადგილე კახა კუჭავა, ამერიკის კონგრესის მიერ საქართველოსთვის გამოყოფილი დახმარების ნაწილის გაყინვის შესახებ გავრცელებულ ინფორმაციას ეხმაურება და უარყოფს მას. “ქართული ოცნების” წევრის თქმით, ამერიკას საქართველოსთვის თანხები არ გაუყინავს, ხოლო დაინიცირებულ კანონპროექტს თვეები სჭირდება იმისთვის, რომ სესიამდე მივიდეს. კახა კუჭავას განცხადებით, მედიაში გავრცელებული ინფორმაცია მისთვის ღიმილის მომგვრელია:
“გავრცელდა ინფორმაცია, რომ თითქოს ამერიკის შეერთებულმა შტატებმა რაღაც თანხები გაყინა და კონგრესმა მიიღო გადაწყვეტილება. კიდევ ერთხელ ვიტყვი რომ ეს ტყუილია. რადგან საუბარია კონგრესის ერთ-ერთი კომიტეტის ერთ-ერთ ქვეკომიტეტში დაინიცირებულ კანონპროექტზე, რომელსაც ჯერ კიდევ ძალიან ბევრი თვე დასჭირდება იმისათვის, რომ სესიამდე მივიდეს და კენჭისყრა ჩატარდეს, ამიტომ მოსაზრება, რომ კანონპროექტი დაინიცირდა არის ღიმილის მომგვრელი,“ – აცხადებს კახა კუჭავა.
შეგახსენებთ, რომ აშშ-ის წარმომადგენელთა პალატამ კანონპროექტი გამოაქვეყნა, რომელიც სახელმწიფო დეპარტამენტების, საგარეო ოპერაციებისა და მასთან დაკავშირებული პროგრამების დაფინანსებას შეეხებოდა.
დოკუმენტში ნახსენებია, რომ საქართველო 2021 წელს დახმარების სახით მიიღებს 132 025 000 აშშ დოლარს იმ შემთხვევაში, თუ აშშ-ს სახელმწიფო მდივანი დაადგენს და ასიგნებების კომიტეტს წარუდგენს ანგარიშს, იმის თაობაზე, რომ საქართველოს მთავრობა შესაბამის ნაბიჯებს დგამს დემოკრატიული ინსტიტუტების გაძლიერების, კორუფციასთან ბრძოლის, კერძო სექტორში კანონის უზენაესობის, ქვეყანაში უცხოური ბიზნესის დაცვის კუთხით, სხვა შემთხვევაში საქართველოსთვის გამოყოფილი ფულადი დახმარება 15%-ით შემცირდება.
ავტორი
ქეთა გაბრიაძე
