„ნაციონალური მოძრაობის“ წევრმა, განათლების ყოფილმა მინისტრმა დიმიტრი შაშკინმა განაცხადა, რომ ოქტომბრის არჩევნებში გამარჯვების შემთხვევაში, პარტია გააგრძელებს 2012 წელს წამოწყებულ განათლების რეფორმას, რომლის მიხედვითაც აბიტურიენტებს ეროვნული გამოცდების ჩაბარების დროისა და ადგილის არჩევის და შეცდომების გამოსწორების საშუალება ექნებათ. გარდა ამისა, ეროვნული გამოცდები წელიწადში სამჯერ ჩატარდება.
დიმიტრი შაშკინი მოუწოდებს განათლების სამინისტროს, რომ იმ აბიტურიენტებისთვის, რომლებიც ჯანმრთელობის მდგომარეობის გამო ერთიან ეროვნულ გამოცდებზე არ დაუშვეს, დაინიშნოს ალტერნატიული გამოცდის თარიღები:
„საქართველოში დაიწყო ერთიანი ეროვნული გამოცდები და სამწუხაროდ, როგორც მოსალოდნელი იყო, გუშინ უკვე რამდენიმე ბავშვი არ დაუშვეს საგამოცდო ცენტრებში, ტემპერატურის გამო. ეს პროცესი გაგრძელდება რამდენიმე კვირის განმავლობაში და სავარაუდოდ, ყველას კარგად გვესმის, რომ ასეთი ბავშვების რაოდენობა კიდევ უფრო გაიზრდება. „ქართული ოცნება“ სადისტურად აკარგვინებს ამ ბავშვებს ერთ წელიწადს. ჩვენ მოვითხოვთ, რომ განათლების სამინისტრომ, სასწრაფოდ, გამოაცხადოს ალტერნატიული თარიღები ყველა იმ აბიტურიენტისთვის, რომელიც ჯანმრთელობის სხვადასხვა მიზეზის გამო არ იქნება დაშვებული გამოცდებზე.
ამ გადაწყვეტილების მიღება არის განათლების სამინისტროს მოვალეობა და ეს არის მარტივი და სამართლიანი გადაწყვეტილება. ალტერნატიული თარიღების დაწესება არის შესაძლებელი აგვისტოში და ჩვენ მოვითხოვთ, რომ განათლების სამინისტრომ, სასწრაფოდ, მიიღოს ეს გადაწყვეტილება და შეწყვიტოს ეს სადისტური მიდგომა აბიტურიენტების მიმართ.
„ნაციონალური მოძრაობა“ ჰპირდება მოსახლეობას, რომ ოქტომბრის არჩევნებში გამარჯვების შემდეგ, ერთ-ერთი პირველი რაც გაკეთდება განათლების სისტემაში, ეს იქნება საგამოცდო სისტემის რეფორმირება და ისეთი სისტემის შექმნა, რომელიც მისცემს აბიტურიენტებს ერთიანი ეროვნული გამოცდების წელიწადში სამჯერ ჩაბარების შესაძლებლობას. ეს არის იმ რეფორმის გაგრძელება, რომელიც ჩვენ დავიწყეთ 2012 წელს და რომელიც „ქართულმა ოცნებამ“ გააჩერა. ამ რეფორმის თანახმად, აბიტურიენტებს ექნებათ შესაძლებლობა, გამოასწორონ გამოცდის შედეგი და ასევე გამოცდის ჩაბარების ადგილი და დრო თვითონვე აირჩიონ,“ – აცხადებს დიმიტრი შაშკინი.
ავტორი
ეკა ქაჩლიშვილი
