სააგენტო „პარალელის“ ექსპერტს, ანალიტიკოს ალექსი ნონიაძეს სოფლად მცხოვრები ფერმერებისა და მოქალაქეების გარკვეული ნაწილი უკავშირდება, რომლებიც ვერ სარგებლობენ ან სრულყოფილად ვერ ღებულობენ სახელმწიფოს ანტიკრიზისული გეგმის, კერძოდ სოფლის მეურნეობის მიმართულებით დაანონსებულ დახმარებებს, რომლებიც აგრობარათებზე დარიცხულ ქულებს ეხება. ექსპერტმა კონკრეტულ პრობლემასთან დაკავშირებით კონკრეტული მაგალითის საფუძველზე სოციალურ ქსელ ფეისბუქში ლაივ ჩართვისას ისაუბრა. ანალიტიკოსმა პასუხების მისაღებად ლიბერთი ბანკის მენეჯმენტს მიმართა.
“მომართავს ფერმერები და უბრალოდ სოფელში მცხოვრები ადამიანები, რომლებიც ვერ სარგებლობენ ან სრულად ვერ სარგებლობენ აგრობარათებით. ამის თაობაზე დავუკავშირდი ლიბერთი ბანკის მენეჯმენტს კითხვებით. მადლობა ბანკის პიარ სამსახურს ქალბატონ დოდო ბოჭორიშვილს ოპერატიულად მოწოდებული პასუხებისთვის” – აღნიშნა ალექსი ნონიაძემ.
ალექსი ნონიაძეს ერთ-ერთმა ფერმერმა მიაწოდა დოკუმენტაცია, რომლის მიხედვით, კონკრეტული პიროვნება 3 სხვადასხვა მიწის ნაკვეთს ფლობს, ასევე ამ მიწებს სხვადასხვა საკადასტრო კოდი აქვს მინიჭებული, პირველი ნაკვეთი – 4035 კვმ; მეორე – 3666 კვმ; მესამე – 2280 კვმ.
ლიბერთი ბანკის პასუხიდან, ირკვევა, რომ პირველ ორ ნაკვეთზე, რომელიც აღემატება 2500 კვმ-ს დახმარება დაერიცხა, ხოლო მესამე მიწის ნაკვეთზე ფერმერმა ვერ ისარგებლა სახელმწიფო დახმარებით, რადგან 2500-ზე ნაკლებია მიწის კვადრატულობა. მიწის ნაკვეთები 4 ადამიანზე, ერთი ოჯახის წევრებზეა რეგისტრირებული, სამწუხაროდ, ნაკვეთები ჯამურად არ შეიკრიბა და დააკლდათ ის დახმარება, რომელიც წესით უნდა მიეღო ოჯახს. მოგეხსენებათ, ჰექტარზე 200 ლარის დახმარებაა გათვალისწინებული.
სახელმწიფო პროგრამით ასევე ვერ სარგებლობენ მოქალაქეები, რომლებსაც, პრობლემური სესხები აქვთ, მათ შორის ლიბერთი ბანკში და რომლებსაც მიწის ნაკვეთზე ინკასო ან ყადაღა აქვთ დადებული.
მსგავსი პრობლემის შემთხვევაში შეგიძლიათ მიმართოთ ბატონ ალექსი ნონიაძეს ნომერზე: 592-502-502
ავტორი
თამთა ასლანიშვილი