საქართველოს პარლამენტის წევრმა, ბორჯომის მაჟორიტარმა დეპუტატმა გედევან ფოფხაძემ პარლამენტის პლენარულ სხდომაზე, სადაც მეორე მოსმენით საარჩევნო კოდექსში შესატანი ცვლილებების პროექტს განიხილავდნენ, აღნიშნა, რომ დეკლარირებული ცვლილებები არ ემსახურება მთავარ მიზანს, შეიქმნას სახალხო ხელისუფლება, შესაბამისად დეპუტატისთვის ამ ცვლილებებს მნიშვნელობა არ აქვს და მხარს არ დაუჭერს:
„წარმოდგენილ ცვლილებებზე მსურს ვისაუბრო იმ კონტექსტში, რომ არის მიზნები, რომლებიც დეკლარირებულია ამ ცვლილებით, მაგრამ არის რეალობა, რომლის პირობებშიც ამ მიზნების მიღწევა ამ ცვლილებებით კი არ უნდა ხდებოდეს, არამედ, აბსოლუტურად, სხვა საშუალებებითა და გზებით. ჩვენი მთავარი მიზანია, რომ არჩევნებით სახალხო ხელისუფლების, სახალხო მთავრობის შექმნას მივაღწიოთ. ეს კანონმდებლობა, ეს ცვლილებები არის თუ არა დასაახლოებელი ნაბიჯი, რომ ჩვენ მივიღოთ სახალხო მთავრობა.
რა განსხვავებაა სახალხო მთავრობასა და იმას შორის, რაც დღეს გვაქვს და რაც გვქონდა გუშინ – სახალხო მთავრობის პირობებში მინისტრები ხალხსა და ქვეყანაზე ფიქრობენ, გუშინ ან დღეს, მოცემულობა იყო და არის ასეთი, რომ მინისტრი რომ იყო, მან თავი უნდა მოაწონოს ან მიშა სააკაშვილს, ან ბიძინა ივანიშვილს.
ეს კანონმდებლობა რაიმე ფორმით ხალხთან გვაახლოებს და გვაძლევს წინაპირობას, რომ ის ხელისუფლება, რომელიც შეიქმნება იქნება სახალხო?
მოდით დავიწყოთ იგივე კვოტებზე საუბარი, რას ვაღწევთ კვოტების ზრდით, ქალთა წარმომადგენლობას პოლიტიკაში? – თუ რეალურად გვინდა პოლიტიკაში ქალთა წარმომადგენლობა და მათი რესურსი გავზარდოთ, პოლიტიკაში ძალოვანებისა და ფინანსური ჯგუფების მონაწილეობა უნდა დამთავრდეს.
„ფულის ტომრებმა“ და ძალოვანებმა არ უნდა განსაზღვრონ თუ ვინ იქნება პოლიტიკაში. თუ ვიღაც ფულით ყიდულობს ამომრჩეველს, თუ ვიღაცა თავისი ფულით განსაზღვრავს ვინ უნდა შევიდეს პარლამენტში, იმას არც კაცი აინტერესებს და არც ქალი, ის თავის მონას დაგისვამს პარლამენტში, ხალხს წაართმევს მანდატს და მისცემს მორჩილ, მართვად ადამიანებს. რეალობა ასეთია, თუ ძალოვანი სტრუქტურები ერევიან რეგიონებში, წარმომადგენლობებში და თითო პარტიული ოფისი იღებს მილიონს და ორ მილიონს იმისათვის, რომ მერე იყიდოს ამომრჩეველი, არცერთ დეპუტატს ფასი არ ექნება, ყველა ეს დეპუტატი ფიქრობს და მართლებიც ხართ მასე რომ ფიქრობთ, რომ ის არა ქართველი ხალხის წარმომადგენელი, არამედ იმის საკუთრებაა ვინც ფული გადაიხადა, ვინც უშიშროებით და ძალოვანებით ზეწოლა მოახდინა ამომრჩეველზე და ხმები უზრუნველყო. ეს უნდა დაგვემთავრებინა ჩვენ, მაგრამ ვიღებთ ზედაპირულ გადაწყვეტილებებს, ვითომ იმ მიზანთან გვინდა დაახლოება, რომელიც არის დეკლარირებული.
ეს არჩევნები უნდა იყოს შეთანხმება ქართველ ხალხთან, რომ მთავრდება ფინანსური ჯგუფების სამსახური, ოლიგარქების, კერძო პირების, იქნება ეს მამუკა ხაზარაძე, ბიძინა ივანიშვილი თუ მიშა სააკაშვილი ამას მნიშვნელობა არ აქვს. ერთადერთი გარიგება უნდა შედგეს პოლიტიკოსებსა და ქართველ ხალხს შორის, ვინც მათ შორის ჩადგება, იმას ქართველმა ხალხმა უნდა გადაუაროს. ეს იქნება სწორი პოლიტიკური გზავნილი ამ არჩევნებზე, სხვანაირად არჩევნები არ უნდა ჩატარდეს. ეს ცვლილებები რა თქმა უნდა, ტექნიკურია და იმ მიზანს არ ემსახურება, რაც არის დეკლარირებული, ამიტომ ჩვენთვის ამ ცვლილებებს მნიშვნელობა არ აქვს და არც ვაპირებ ხმის მიცემას.
ქართველმა ხალხმა უნდა დაადგინოს ის წესები, რა წესებიც შემდეგ უნდა გაფორმდეს პარლამენტში, ამ პარლამენტში ეს ვერ ხდება, ეს უნდა მოხდეს მომავალ პარლამენტში,“ – განაცხადა გედევან ფოფხაძემ.
ავტორი
თამთა ბარბაქაძე
