პარტია „ახალი საქართველოს“ თავმჯდომარე გიორგი ვაშაძე აცხადებს, რომ პროცესების ნორმალიზებისათვის აუცილებელია გიორგი რურუას გათავისუფლება და საარჩევნო კოდექსში ცვლილებები. ასევე ოპოზიციონერი ლიდერის განმარტებით „ქართულმა ოცნებამ“ ძალადობისაგან თავი უნდა შეიკავოს, რომელიც, მაგალითად, გამოიხატება კახა კალაძის მხრიდან ზედამხედველობის სამსახურის არაკანონიერი თავდასხმებით ახალგაზრდებზე:
„აქტიური კამპანია მალე დაიწყება. ჩვენ კი კახა კალაძე გვებრძვის. საბანკო სექტორთან დაკავშირებით ხელმოწერებს ვაგროვებთ, პროცენტების შესამცირებლად და თბილისის მერს მიქსეული ჰყავს ზედამხედველობის თანამშრომლები, რომლებიც ხელს უშლიან ჩვენს ახალგაზრდებს ხელმოწერების შეგროვებაში. – ეს არის რეალური გარემო, ეს ხდება კალაძისა და „ქართული ოცნების“ მხრიდან სრულიად უკანონოდ. მსგავს დარღვევებს თუ ექნება ადგილი ძალიან მწვავე იქნება შეფასება ჩვენი საერთაშორისო პარტნიორების მხრიდან.
პროცესების ნორმალიზებისათვის აუცილებელია, რომ რურუა გათავისუფლდეს, საარჩევნო კოდექსში შევიდეს შესაბამისი ცვლილებები, რომელიც ეუთოს აქვს 27 რეკომენდაციაში მოცემული და ასევე პროცესების ნორმალიზებისათვის აუცილებელია, რომ „ქართულმა ოცნებამ“ ძალადობაზე ხელი აიღოს.
მათ უკვე დაიწყეს ძალადობა, როდესაც მეტროებთან ჩვენ ახალგაზრდებს მიუვარდება ხოლმე ზედამხედველობის სამსახური, კორუმპირებული კალაძისგან, რომელიც საბანკო სექტორს იცავს და არ იცავს ხალხს.
უკაცრავად, მაგრამ ნორმალიზება ვერცერთ შემთხვევაში ვერ იქნება და ამ საკითხზე რეაგირება აუცილებლად ექნებათ საერთაშორისო საზოგადოებას,“ – აცხადებს გიორგი ვაშაძე.
ავტორი
თამთა ასლანიშვილი
