საქართველოს ეკონომიკისა და მდგრადი განვითარების მინისტრმა, ნათია თურნავამ საკოორდინაციო საბჭოს წევრების ბრიფინგზე, კოვიდ-19-ის ფონზე დაწესებული შეზღუდვების მოხსნაზე ისაუბრა.
მისი განცხადებით, საგამოფენო საქმიანობა, ტრენინგების და კონფერენციების ჩატარება, ორშაბათიდან იქნება შესაძლებელი, თუმცა შეზღუდვები ისევ ვრცელდება ფიტნეს ცენტრებსა და აუზებზე, რომელთა გახსნა გარკვეულ რისკ-ფაქტორებთანაა დაკავშირებული. ნათია თურნავას განცხადებით მათ გახსნასთან დაკავშირებით ჯერ საუბარიც არ ყოფილა:
,,მსურს მოგახსენოთ, რომ დღეს ვიმსჯელეთ გეგმაზომიერად. კიდევ არის დარჩენილი ბიზნეს საქმიანობები, რომელზეც შეზღუდვები ვრცელდება. დიდი ალბათობით, სხვადასხვა ბიზნეს საქმიანობა ორშაბათიდან იქნება დაშვებული. მაგალითად, გამოფენები და მათი საქმიანობა, ტრენინგები და კონფერენციები სასტუმროებში. როგორც მოგეხსენებათ, ბუნებრივია საერთაშორისო ვიზიტორები მოგვაკლდა, თუმცა ჩვენი მოქალაქეების მხრიდან და სხვადასხვა ორგანიზაციის ეგიდით მოთხოვნა არის, რომ ჩაატარონ ტრენინგები, კონფერენციები და საქმიანი შეხვედრები.
ჩვენ ვიმსჯელეთ და ვფიქრობთ, რომ ეს მოთხოვნა, რომელიც სასტუმროებმა წამოგვიყენეს, საკმაოდ რაციონალური და სამართლიანია. რა თქმა უნდა, ეს რეკომენდაციების დაცვით მოხდება. პრაქტიკულად, ჯანდაცვის სამინისტროს შემუშავებული აქვს შესაბამისი პროტოკოლი. მას მცირე დაზუსტება დასჭირდება და უკვე ორშაბათამდე ეს ყველაფერი გამოქვეყნდება, უსაფრთხოების პროტოკოლის დაცვით. ეს ერთი მხრივ იქნება საკმაოდ კარგი გადაწყვეტილება, რომ არ შეწყდეს ტრენინგ-პროგრამა და მეორე მხრივ, დავეხმაროთ ჩვენს სასტუმროებს, რომ მათ არ დაკარგონ შესაძლებლობა, მოემსახურონ ასეთ ღონისძიებებს.
საგამოფენო აქტივობას რაც შეეხება, ესეც მნიშვნელოვანია და რა თქმა უნდა, ეს წესების დაცვით მოხდება. კიდევ გვრჩება შეზღუდული საქმიანობის მცირე რაოდენობა. გვესმის ყველას პრობლემა. ეს არის ფიტნეს ცენტრები, აუზები, მაგრამ შედარებით მომატებული რისკის საქმიანობაა. შემდეგ ეტაპზე უკვე განვიხილავთ ამ საქმიანობებზე შეზღუდვების მოხსნასაც ყველა პროტოკოლის დაცვით. ამ ეტაპზე, ვსაუბრობთ ტრენინგებზე, კონფერენციებზე, საგამოფენო ღონისძიებებზე“, – განაცხადა ნათია თურნავამ.
შეგახსენებთ, რომ რუსთაველის გამზირზე სავარჯიშო დარბაზების გახსნასთან დაკავშირებით, რამდენჯერმე აქცია გაიმართა. სავარჯიშო დარბაზების მფლობელებისა და სპორტსმენების განცხადებით აქცია პერმანენტულ ხასიათს მიიღებს და იქამდე გაგრძელდება, ვიდრე დარბაზები არ გაიხსნება.
ავტორი
ქეთა გაბრიაძე
