აჭარის ტელევიზიასთან გამართულ სოლიდარობის აქციაზე საზოგადოებრივი მაუწყებლის აჭარის ტელევიზიისა და რადიოს ყოფილი დირექტორიც იმყოფებოდა. ნათია კაპანაძის თქმით, აქცია საკმაოდ ხალხმრავალი იყო, რადგან საზოგადობას სჭირდება ობიექტური საზოგადოებრივი მაუწყებელი და მხარდაჭერის ტალღა ამ საჭიროებასთან ერთად კიდევ უფრო გაიზრდება.
„წინააღმდეგობა მაშინ დაიწყო, როდესაც აჭარის საზოგადოებრივ მაუწყებელში შეიკრიბა გუნდი, რომელსაც მაუწყებლის იდეის სჯერა. ეს გუნდი თანდათან ხვდება საზოგადოებრივ ტვირთს, იმუშაოს ადამიანებისთვის, ვისაც ნამდვილად სჭირდება მათი უფლებებისა და პრობლემური საკითხების წინ წამოწევა.
ვფიქრობ, რაც უფრო მეტი დრო გადის, ეს საჭიროება მით უფრო მაღალია ჩვენს საზოგადოებაში და მგონია რომ მხარდაჭერის ტალღა გადაიზრდება ძალიან დიდ საჭიროებაში, რათა ჩვენ გვქონდეს ჩვენი საზოგადოებრივი მაუწყებელი. ვფიქრობ, ეს არის პროგრესის ნაწილი და ამ საჭიროებას ვერაფერი და ვერავინ შეაჩერებს,“- განაცხადა ნათია კაპანაძემ.
შეგახსენებთ, გუშინ ბათუმში, აჭარის საზოგადოებრივი მაუწყებლის ალტერნატიული პროფესიული გაერთიანების ორგანიზებით სოლიდარობის აქცია გაიმართა. აჭარის ტელევიზიის წინ შეკრებილმა სამოქალაქო აქტივისტებმა და სხვადასხვა მედიაორგანიზაციების ხელმძღვანელებმა აჭარის ტელევიზიის ახლანდელ მენეჯმენტს მოუწოდეს თანამშრომლების დევნა შეწყვიტოს და გათავისუფლებული ჟურნალისტები სამსახურში აღადგინოს.
ლიკა დევდარიანი
სააგენტო “პარალელის”
რეგიონალური კორესპონდენტი