“საქართველოს სტრატეგიული ანალიზი ცენტრის” ორგანიზებით გამართულ ბრიფინგზე გიორგი ვაშაძემ ისაუბრა საქართველოს ხელისუფლების მიერ დასავლურ ინვესტიციებზე ხელოვნური ბარიერების შექმნაზე, იმ დროს, როცა რუსული კაპიტალებისათვის გახსნილია. მმართველი პარტიის ოპონენტი აღნიშნავს, რომ ეს არის საქართველოს ეროვნული ინტერესების საწინააღმდეგო ქმედება:
„საქართველომ დამოუკიდებლობის მიღწევის შემდეგ თავისი გეოპოლიტიკური არჩევანი გააკეთა დასავლეთში ინტეგრაციისაკენ. დასავლეთში ინტეგრაცია, ნატოში, ევროკავშირში ინტეგრაცია გულისხმობს საქართველოს გახსნას ამერიკული და ევროპული ინვესტიციებისათვის. პირველ რიგში ეს არის ჩვენი ეროვნული უსაფრთხოებისათვის ამოსავალი წერტილი, ასევე ეკონომიკური განვითარებისათვის უმნიშვნელოვანესი იმისათვის, რომ შემოვიდეს ყველაზე დიდი რესურსები ქვეყანაში, რომ შეიქმნას სამუშაო ადგილები და ვიყოთ ენერგოდამოუკიდებლები. კონკრეტულად ფრონტერას შემთხვევაში ეს არის ენერგოდამოუკიდებლობისაკენ გადადგმული გზა.
ჩვენ გვჭირდება ხელისუფლება, რომელიც ბარიერებს კი არ შეუქმნის დასავლურ ინვესტიციებს, არამედ პირიქით დაეხმარება, წაახალისებს, თუმცა სამწუხარო რეალობის წინაშე ვართ. დასავლურ ინვესტიციებს აქვთ პრობლემა, ხოლო რუსული ინვესტიციებისათვის ყველაფერი გახსნილია, დასავლურ კაპიტალს აქვს შეზღუდვები ქვეყანაში მათთან ვდაობთ საერთაშორისო არბიტრაჟებში, რუსულ კაპიტალს კი გახსნილი აქვს. მაგალითად გაზპრომის შეთანხმება, რომელიც უახლოეს პერიოდში გაგრძელდა და გაფორმდა.
სამწუხაროდ, ეს მიუთითებს იმაზე, რომ ის წერილები, რომლებიც ამერიკის შეერთებული შტატების მხრიდან არის გამოგზავნილი და კონკრეტულ მტკიცებულებებზე აგებული, იმის დადასტურებაა, რომ საქართველოს ხელისუფლებამ გადაწყვიტა, ჩაკეტოს ჩვენი ქვეყანა დასავლური ინვესტიციებისათვის,“ – განაცხადა გიორგი ვაშაძემ.
ავტორი
თამთა ასლანიშვილი