რეგულარული ფრენების შეზღუდვის ივლისის ბოლომდე შესაძლო გადაწევის თაობაზე საქართველოს ეკონომიკისა და მდგრადი განვითარების მინისტრმა ნათია თურნავამ მთავრობის სხდომის დასრულების შემდეგ განაცხადა. მისი თქმით, საერთაშორისო ტურიზმის აღდგენასთან დაკავშირებით საქართველოს მთავრობის მთავარი პრიორიტეტი მოქალაქეების უსაფრთხოებაა, ამიტომ ყველაფერი მსოფლიოში არსებულ ეპიდემიოლოგიურ სიტუაციაზე იქნება დამოკიდებული:
„ჩვენ ივლისშიც ძალიან ფრთხილად მოვეკიდებით უცხო ქვეყნიდან ჩამოსულ ვიზიტორებს, საერთაშორისო ტურისტებს. აქ იქნება რამდენიმე მიმართულება, ბიზნეს ვიზიტორებისთვის და სტუდენტებისთვის ცალკე წესი შემუშავდა და მალე გახდება საჯარო.
ველოდებით რა გადაწყვეტილებას მიიღებს ევროკავშირი, რომელმაც ჯერ მხოლოდ საკუთარ წევრ სახელმწიფოებს შორის გახსნა საზღვარი და ამ დღეებში მიიღებს გადაწყვეტილებას არაწევრ ქვეყნებზეც. რაც შეეხება ფრენებს, დიდი ალბათობით, მოგვიწევს რეგულარული ფრენების შეზღუდვის გადაწევა ივლისის ბოლომდე, თუმცა ჩარტერული ფრენები დღესაც ხორციელდება.
რეგულარული ფრენების აღდგენა პირველ რიგში დამოკიდებულია დანარჩენი მსოფლიოს ეპიდემიოლოგიურ ვითარებაზე. ჩვენ ყველაზე მეტად გვინდა, რომ აღდგეს რეგულარული ფრენები, რა თქმა უნდა, ჯანდაცვისა და საგარეო საქმეთა სამინისტროებთან შეთანხმებით. ეს ის ვითარებაა, როცა პრიორიტეტული ჯანმრთელობაა“, – განაცხადა ნათია თურნავამ.
ავტორი
მახო ზავრაშვილი
