“ქართული ოცნების” აღმასრულებელმა მდივანმა, ირაკლი კობახიძემ პარლამენტში დასკვნითი სიტყვის თქმისას განაცხადა, რომ 25 წლის განმავლობაში პირველად არის შესაძლებლობა, არჩევნები ჩატარდეს ისე, როდესაც სრულიად პოლიტიკური სპექტრი თანხმდება, რაც უნიკალური შესაძლებლობაა. ასევე ყოფილი პარლამენტის თავმჯდომარე აღნიშნავს, რომ ეს ცვლილება შესძენს სიმყარეს კონსტიტუციის ახალ რედაქციას, იმ რედაქციას, რომელიც ერთად მიიღეს ორი წლის წინ:
„ხაზს გავუსვამ კანონპროექტის მიღების მნიშვნელობას, ჩვენ ამ 25 წლის განმავლობაში პირველად გვეძლევა იმის შესაძლებლობა, რომ არჩევნები ჩავატაროთ იმგვარი საარჩევნო სისტემით, რომელზეც თანხმდება სრულიად პოლიტიკური სპექტრი. ეს არის უნიკალური შესაძლებლობა 25 წლის თავზე, მას შემდეგ, რაც ამოქმედდა საქართველოს კონსტიტუცია და ბუნებრივია თითოეული ჩვენგანის პასუხისმგებლობაა, ხელიდან არ გავუშვათ ეს შესაძლებლობა.
როდესაც საუბარია სრულად და არასრულად პროპორციულ საარჩევნო სისტემაზე, მე მინდა შეგახსენოთ, რომ ეს სისტემა 120/30-ზე, პრაქტიკულად, წარმოშობს იმის იდენტურ შედეგს, რა შედეგსაც წარმოშობდა სრულად პროპორციული სისტემა 5%-იანი საარჩევნო ბარიერით. ამ სისტემის საფუძველზე ზუსტად ისევე გადანაწილდება მანდატები უმრავლესობასა და ოპოზიციას შორის, როგორც გადანაწილდებოდა მანდატები სრულად პროპორციული სისტემით 5%-იანი საარჩევნო ბარიერის პირობებში.
თამამად შეიძლება ითქვას, რომ ეს არის არსებითად პროპორციული საარჩევნო სისტემა, რომელიც არის შემოთავაზებული წარმოდგენილი კანონპროექტით. კანონპროექტის მნიშვნელობაზე, როდესაც ვსაუბრობთ, დამატებით უნდა აღინიშნოს, რომ ეს ცვლილება შესძენს სიმყარეს კონსტიტუციის ახალ რედაქციას, იმ რედაქციას, რომელიც ჩვენ ერთად მივიღეთ ორი წლის წინ, რომელიც ადგენს ევროპული ტიპის ძალიან დახვეწილ საპარლამენტო მმართველობის სისტემას თავისი სრულად პროპორციული საარჩევნო სისტემით და თითოეულმა ჩვენგანმა უნდა ვიამაყოთ იმით, რომ ამ ახალი რედაქციის თანაავტორები ვართ, “ – განაცხადა ირაკლი კობახიძემ, პარლამენტში დასკვნითი სიტყვით გამოსვლისას.
ავტორი
თამთა ასლანიშვილი
