ირაკლი კობახიძის მიერ “ლეიბორისტული პარტიის” ოფისში შეკრებილი გაერთიანებული ოპოზიციის რუსულ ძალად, ხოლო ცალკეული ლიდერების “გრუ”-ს აგენტად თუ რუსული ინტერესების გამტარებლად მიჩნევას ეხმიანება პოლიტიკური პლატფორმა “ახალი საქართველოს” ლიდერი გიორგი ვაშაძე და აცხადებს, რომ თუ მსგავს განცხადებას პარლამენტის ყოფილი თავმჯდომარე აკეთებს, ეს უნდა იყოს გამოძიებული და თუ ვერ დაამტკიცებენ, ამ შემთხვევაში ხელისუფლების ოპონენტი მოითხოვს კობახიძე გამოვიდეს და საჯაროდ სახეზე ნაცარი წაისვას:
“არა თუ თავი ამოწურა, უკვე თავი მოგვაბეზრა კობახიძეებმა და ყველამ, ვინც ჩაბღაუჭებულია თანამდებობას თავისი კორუფციული, ფინანსური ინტერესებისთვის და მზად არის სამშობლო ბოლომდე გაყიდოს, მოიგონოს ათასნაირი სისულელე და ათასნაირი ზღაპარი.
კობახიძეს ამ განცხადებაზე მე შევუბრუნებ: თუ ეს ასე არის, მაშინ თქვენი ვალდებულებაა ის „გრუ-ს“ აგენტები, რომლებიც დაასახელეთ, მაშინ მათ მიმართ გამოძიება აწარმოოთ და დააოკოთ. თუ ამას ვერ იზამთ, მაშინ კობახიძე გამოვიდეს და საჯაროდ სახეზე ნაცარი წაისვას,“ – აცხადებს გიორგი ვაშაძე.
ინფორმაციისთვის, „პალიტრანიუსის“ გადაცემაში „360 გრადუსი“ ირაკლი კობახიძემ ნინო ბურჯანაძე, გუბაზ სანიკიძე, ირაკლი ოქრუაშვილი და მთლიანობაში “ლეიბორისტულ ბარტიის” ოფისში შეკრებილი მთელი ოპოზიციური სპექტრი რუსული ძალის, “გრუ-ს” აგენტის, რუსული ინტერესების გამტარებლის ეპითეტებით მოიხსენია.
გიორგი ვაშაძის კომენტარს პარტია “ახალი საქართველოს” პრესსამსახური ავრცელებს.